Sud pa spravie 20-hadovaha studenta Arcioma Bajarskaha prachodzić u zakrytym režymie. Jamu pahražaje da siami hadoŭ kałonii
U Minskim haradskim sudzie raspačaŭsia sudovy praces nad 20-hadovym palitźniavolenym Arciomam Bajarskim, jaki ŭtrymlivajecca za kratami ŭžo amal dzieviać miesiacaŭ. Eks-studenta 2-ha kursa chimfaka BDU abvinavačvajuć pavodle dvuch artykułaŭ Kryminalnaha kodeksa.
29.11.2021 / 11:34
Heta nastupnyja artykuły: č. 1 art. 361-1 (stvareńnie i kiraŭnictva ekstremisckim farmiravańniem) i č. 1 art. 342 (arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich). Arciomu pahražaje da siami hadoŭ pazbaŭleńnia voli, paviedamlajuć pravaabaroncy.
Na pačatku sudovaha pracesu suddzia Alena Šylko pa chadajnictvie prakurora vyrašyła pravodzić sudovaje raźbiralnictva pa spravie ŭ zakrytym režymie, bo «ŭ materyjałach spravy majucca źviestki ab intymnym baku žyćcia abvinavačanaha, a taksama infarmacyja z telehram-kanała, pryznanaja ekstremisckaj».
Palitviaźniu stavicca ŭ vinu administravańnie telehram-kanała «Maja kraina Biełaruś», telehram-čata, a taksama ŭdzieł u Maršy «Narodnaha ŭltymatuma» 25 kastryčnika minułaha hoda.
Arciomu pahražaje da siami hadoŭ pazbaŭleńnia voli.
Pieršy raz jaho zatrymali paśla Maršu piensijanieraŭ u minułym hodzie, źbili i aryštavali na 15 sutak pavodle «narodnaha» artykuła 24.23 KaAP.
Druhi raz Arcioma zatrymali sioleta napiaredadni Dnia voli — 24 sakavika. Ranicaj u internat da jaho pryjšli siłaviki — padstavaj staŭ bieł-čyrvona-bieły ściah, jaki, pavodle ich infarmacyi, chtości vyviesiŭ u pakoi. Usich studentaŭ pakłali na padłohu i zakavali ŭ kajdanki, ale zabrali tolki Arcioma. Jaho aryštavali spačatku administracyjna. Asudzili na 25 sutak pa art. 24.23 KaAP, ale potym vystavili abvinavačvańnie pa kryminalnym artykule za «stvareńnie abo kiraŭnictva ekstremisckim farmavańniem».