Chvoruju na rak žančynu ŭžo dvojčy aryštavali za repost «ekstremisckich» materyjałaŭ
Chvoruju na rak supracoŭnicu prahramy raźvićcia AAN užo dvojčy aryštavali za repost «ekstremisckich» materyjałaŭ. Na Akreścina žančyna zachvareła na cystyt, paviedamlajuć pravaabaroncy.
30.11.2021 / 17:21
Siońnia ŭ sudzie Pieršamajskaha rajona sudździa Maksim Trusievič razhladzieŭ spravu 49-hadovaj Anastasii Nieścieravaj. Jana pracuje finansava-administracyjnaj asistentkaj u prahramie raźvićcia AAN u Biełarusi. Zatrymali žančynu jašče 18 listapada. Tady jaje aryštavali na 10 sutak pa art. 19.11 KaAP za zachoŭvańnie «ekstremisckich» materyjałaŭ. Adrazu ŭ pratakole napisali, što jana zrabiła repost z «ekstremisckaha» kanała, ale milicyjanty byli vymušanyja pierapisvać pratakoł, bo toje paviedamleńnie, za jakoje jaje sudzili, dasyłała nie sama Anastasija, a naadvarot — joj. Taksama viadoma, što muža Nieścieravaj taksama aryštavali na 15 sutak za «raspaŭsiudžvańnie infarmacyjnaj pradukcyi, uklučanaj u Respublikanski śpis ekstremisckich materyjałaŭ». Doma ŭ muža i žonki prajšoŭ pieratrus, a techniku kanfiskavali.
28 listapada Anastasija na volu nie vyjšła, bo na jaje skłali paŭtorny pratakoł pa art. 19.11 KaAP. Na hety raz za repost z vydańnia «Zerkalo». Pa słovach žančyny, jana adpraviła siabroŭcy, jakaja žyvie nie ŭ Biełarusi, infarmacyju pra jaje plamieńnicu, jakaja była raźmieščanaja na «Zerkalo». Vinu svaju Nieścierava pryznała, ale paprasiła sudździu pakarać jaje štrafam.
U Anastasii Nieścieravaj dyjahnastavany rak, jaki patrabuje chirurhičnaha ŭmiašalnictva. Akramia hetaha, 73-hadovaj maci Nieścieravaj patrebny dohlad.
Ale sudździa Maksim Trusievič nie źviarnuŭ na heta ŭvahi i aryštavaŭ žančynu na 15 sutak. Niehladziačy na ciažkuju chvarobu i toje, što jana ŭ CIPie zachvareła na cystyt i vymušanaja pić antybijotyki pa pryznačeńni lekara, Anastasija praviadzie za kratami ahułam 25 sutak.