Kiroŭca ŭrezaŭsia ŭ statak karovaŭ. Ciapier kałhas zapłacić za paškodžańnie aŭto
DTZ zdaryłasia letaś kala ahraharadka Ivanaŭsk u Čašnickim rajonie. Kiroŭca «Reno» pozna viečaram jechaŭ z chutkaściu 90-95 km/h z uklučanym śviatłom far. Niečakana na darohu vybieh statak karovaŭ, mužčyna pačaŭ tarmazić, ale ŭsio ž adbyłosia sutyknieńnie. DAI pryjšła da vysnovy, što kiroŭca dziejničaŭ pravilna i ničoha nie parušyŭ. Tady jaho žonka, ŭładalnica aŭto, źviarnułasia ŭ sud — patrabuje, kab haspadarka, jakoj naležać karovy, zapłaciła za paškodžańnie aŭtamabila.
08.12.2021 / 19:56
U sudzie stali viadomyja abstaviny zdareńnia. Akazałasia, što ŭ toj dzień 178 karovaŭ «Ivanaŭski-Ahra» paśvili kala darohi. Pry tym pas tolki adzin pastuch. Choć pa narmatyvach na sto hałoŭ pavinien być nie tolki pastuch, ale i žyviołavod. Taho na poli nie było, bo ŭ kałhasie deficyt kadraŭ.
Pavodle acenki, materyjalnyja straty ad zdareńnia skłali amal 6 tysiač rubloŭ. Jašče 1300 rubloŭ rubloŭ žančyna patraciła na zvarot da śpiecyjalistaŭ i ŭ sud. Pradpryjemstva «Ivanaŭski-Ahra» patrabavańni zajaŭnicy nie padtrymała.
Sud pastanaviŭ, što supracoŭniki haspadarki pavinny byli kantralavać statak bliz darohi, tamu zadavoliŭ patrabavańni zajaŭnicy. Takim čynam, kałhas vinien kala 7300 rubloŭ, pradstaŭniki haspadarki nie abskardžvali rašeńnie suda.