Prezident litoŭskaj asacyjacyi ekśpiedytaraŭ i łahistaŭ: Treba vielmi surjoznaja pryčyna, kab nie dać biełarusam vazić kalij praź Litvu
Prezident Litoŭskaj nacyjanalnaj asacyjacyi ekśpiedytaraŭ i łahistaŭ Lineka Edmundas Daŭkantas kaža, što, kali abapiracca na Kanviencyju ab mižnarodnych pieravozkach pa čyhuncy, to patrebnaja vielmi surjoznaja pryčyna, kab nie dać dazvoł achvotnym vazić hruzy praź Litvu, piša delfi.lt.
23.01.2022 / 10:40
«Nie nadta šmat techničnych i jurydyčnych mahčymaściaŭ heta zabaranić ci nie dazvolić. Kali pieravozčyk nie kryminalny złačynca abo nie pradpryjemstva, jakoje znachodzicca pad sankcyjami, i prosić (dazvołu) pradastaŭlać pasłuhu na terytoryi Litvy, to Litoŭskaja čyhunka praktyčna moža rehulavać tranzit tolki cenami, ale kab skazać «nie» — na heta patrebnaja vielmi salidnaja pryčyna»,
— skazaŭ Edmundas Daŭkantas.
Pierad hetym Litoŭskaja čyhunka infarmavała «Biełaruśkalij» ab pastanovie ŭrada skasavać z 1 lutaha padpisanuju ŭ 2018 hodzie i dziejnuju da kanca 2023 hoda damovu, pavodle jakoj u hod pieravozicca kala 11 młn ton uhnajeńniaŭ. Kampanija taksama była pastaŭlenaja ŭ viadomaść, što zajaŭki na pieravozku jaje hruzaŭ z 1 lutaha pa hetaj damovie nie buduć uzhodnienyja.
21 studzienia hrupa kampanij «Litoŭskija čyhunki» paviedamiła, što da jaje źviarnulisia try biełaruskija kampanii, jakija nie znachodziacca pad sankcyjami, z prapanovaj ab pieravozcy biełaruskich kalijnych uhnajeńniaŭ. Siarod hetych pradpryjemstvaŭ — daččynaje pradpryjemstva «Biełaruśkalija» «Biełaruskaja kalijnaja kampanija», a taksama kampanii «Bielintertrans» i «Biełkalij-MIHAO».
Pierad tym, jak pryniać rašeńnie, Litoŭskaja čyhunka źviarnułasia va ŭradavuju kamisiju pa praviercy ździełak stratehičnych pradpryjemstvaŭ.