Слухачы звароту Лукашэнкі: Ад нашай арганізацыі там была ўжо заражаная кавідам жанчына
Як вядома «Нашай Ніве», сёння на рабоце па прычыне хваробы не з'явіліся некаторыя з тых, хто прысутнічаў на пасланні Лукашэнкі 28 студзеня. Гаворка ідзе пра чыноўнікаў і сілавікоў з розных рэгіёнаў рэспублікі. Мы не называем іх пасады, каб забяспечыць ананімнасць крыніцам. Масштабы захворвальнасці пакуль невядомыя. Мы маем інфармацыю пра два выпадкі.
31.01.2022 / 18:18
«У нашай арганізацыі, як выявілася, на пасланні была ўжо заражаная кавідам жанчына, якой вынік тэсту прыйшоў акурат у пятніцу. Цяпер яна ў хваравітым стане і на работу не пайшла, як і яе калегі па кабінеце», — сказалі «Нашай Ніве» у адной з абласных арганізацый.
Падобны водгук прыйшоў і з аднаго з сілавых упраўленняў.
«Яго хвароба ўжо стала прадметам кпінаў: кажа, што прастуда, тэст здаваць адмаўляецца, на работу не пайшоў», — сказалі «Нашай Ніве» абазнаныя.
Нагадаем, пасланне Лукашэнкі гучала 28 студзеня ва ўмовах татальнай антысанітарыі — па апублікаваных фота і відэа было відаць, што маскі былі на тварах у мізэрнай колькасці асоб.
На сходзе збольшага прысутнічалі людзі, якія працуюць у дзяржаўнай сістэме.
***
Калі вы ведаеце пра выпадкі захворвання слухачоў паслання Лукашэнкі да беларускага народа, пішыце ў наш чат-бот у Тэлеграме.