У Беларусі ўжо распачалі дзевяць крымінальных спраў, звязаных з рэферэндумам
У Беларусі завялі дзевяць крымінальных спраў, звязаных з правядзеннем канстытуцыйнага рэферэндуму. Пра гэта паведаміў начальнік Галоўнага ўпраўлення аховы правапарадку і прафілактыкі міліцыі грамадскай бяспекі МУС Аляксандр Купчэня падчас прэс-канферэнцыі.
18.02.2022 / 12:34
У МУС ужо паступіла каля сотні зваротаў ад членаў выбаркамаў. Усе яны зарэгістраваныя; па кожным праводзіцца праверка ў адпаведнасці з крымінальным заканадаўствам. Большасць фактаў рэгіструецца ў Мінску і буйных гарадах краіны, піша Zerkalo.io.
— Следчымі органамі на гэты момант ужо распачата дзевяць крымінальных спраў, у тым ліку за перашкоду праву на ўдзел у рэферэндуме, незаконныя дзеянні ў дачыненні да персанальных звестак, паклёп або псаванне маёмасці, — сказаў Купчэня.
Аляксандр Купчэня падкрэсліў, што ўчасткі для галасавання абсталююць трывожнымі кнопкамі. Міліцыя будзе ахоўваць іх кругласутачна.
— Дзейнічаць неадкладна, хутка і аператыўна мы гатовыя на любое правапарушэнне — адзначыў Купчэня.