U Vilni adkryłasia krama, jakoj kiruje štučny intelekt. Tam niama zvykłych kas
Handlovaja sietka Iki ŭ starym horadzie litoŭskaj stalicy (vuł. Vialikaja (Dydžoi), 6) adkryła pieršuju kramu, jakoj kiruje štučny intelekt. Heta pieršy taki mahazin u Litvie. U hetaj kramie niama pradaŭcoŭ: čałaviek zachodzić, skanuje apłatnuju kartku i biare nieabchodnyja tavary, a na vychadzie nieabchodnuju sumu zdymajuć ź jaho rachunka, piša Delfi.lt.
23.02.2022 / 14:26
Hetaj kramaj kiruje štučny intelekt. Kasy tut niama. Apłata takaja: čałaviek pravodzić apłatnaj kartaj la ŭvachodu, dźviery adčyniajucca, pakupnik zachodzić, biare tavary, składvaje ich kudy choča — u zaplečnik, kišeni, prosta trymaje ŭ rukach — padychodzić da vychadu, moža zirnuć jašče raz na śpis tavaraŭ, prykłaści kartu dla apłaty — i ŭsio.
Pakupniku nie treba vykładvać tavar na kasu, skanavać kody, dastavać telefon, pravodzić im apłatu. Padyšoŭ, pahladzieŭ, uziaŭ, prykłaŭ kartu — i ŭsio.
Usio astatniaje nieprykmietnaje dla voka — štučny intelekt ŭsio adznačaje, bačyć, paviedamlaje rabotnikam ab niedachopie tavaraŭ na palicach, vykonvaje zakazy, prahnazuje patrebnaść u tavarach, rehuluje patoki. Kali pasprabuje zajści «lišni» čałaviek, pra heta paviedamić ekran», — raspavioŭ kiraŭnik Pixevia Mindaŭhas Ehlinskas (kampanija-raspracoŭščyk).
Kab kuplać tavary ŭ takoj kramie, treba mieć mabilnuju prahramu abo bankaŭskuju kartu. Kali pakupnik zaŭvažyŭ, što hrošaj na rachunku nie chapaje, jon moža pakłaści tavar na miesca i syści.
Ehlinskas patłumačyŭ, što kali źniknie elektryčnaść, kłijent nie budzie začynieny ŭ kramie — uklučycca batareja, čałaviek zmoža pakinuć pamiaškańnie.
Hetuju kramu jašče buduć testavać, u vypadku nieabchodnaści jaje ŭdaskanalać. Naprykład, pakul u kramie možna apłacić pakupki tolki kartaj, ale jość pra mahčymaść najaŭnaha raźliku.
Pakul u kramu mohuć uvajści tolki try pakupniki adnačasova, u budučyni ich kolkaść mohuć pierahledzieć. U asartymiencie buduć roznyja zakuski, paŭfabrykaty, napoi, hihijeničnyja i bytavyja tavary pieršaj nieabchodnaści, kava na vynas. Usiaho 500 vidaŭ tavaraŭ.
Ale tut nie budzie ałkaholnych napojaŭ, bo, pa zakonach, piersanał pavinien pravieryć ŭzrost pakupnika.