Пад Лагойскам затрымалі двух дзяцей за графіці пра вайну ва Украіне
Дзеці з вёскі Чудзенічы пад Лагойскам нанеслі графіці на вясковы мемарыял загінулым у гады Другой сусветнай вайны, паведамляе прэс-служба УУС Мінскага аблвыканкама.
09.03.2022 / 20:25
Жыхары вёскі Чудзенічы заўважылі надпісы на адваротным баку мемарыяла на брацкай магіле раніцай 6 сакавіка. Чорнай фарбай на ім былі нанесеныя словы «Украина», «Беларусь», «Рассия» і нейкія малюнкі (як мяркуецца, непрыстойнага зместу, але дакладна сказаць нельга: УУС іх зарэтушавала).
Неўзабаве міліцыянеры затрымалі двух мясцовых падлеткаў 14 і 15 гадоў.
«Юнакі сваю віну прызналі, патлумачыўшы ўчынак уплывам відэаролікаў з інтэрнэту. Пасля яны ўласнаручна зафарбавалі «майстэрствы» на апаганенай славутасці ў цэнтры вёскі. Дзеянням падлеткаў будзе дадзена прававая ацэнка», — паведамляе ведамства.