Zialenski padpisaŭ zakon ab kryminalnym pakarańni za kałabaracyjanizm i admaŭleńnie ahresii
Prezident Ukrainy Uładzimir Zialenski padpisaŭ zakon, jaki ŭvodzić va ŭkrainski Kryminalny kodeks adkaznaść za kałabaracyjanizm.
15.03.2022 / 16:39
Fota: UNIAN
Pra heta paviedamiŭ namieśnik staršyni Viarchoŭnaj Rady Alaksandr Karnijenka, paviedamlaje meduza.io.
U ofisie prezidenta Ukrainy hetuju infarmacyju pakul nie pacvierdzili.
Zakonaprajekt praduhledžvaje, u pryvatnaści, pakarańnie za admaŭleńnie ahresii suprać Ukrainy, za viadzieńnie haspadarčaj dziejnaści ŭ supracoŭnictvie z ahresaram abo stvoranymi im «orhanami ŭłady», a taksama za raspaŭsiudžvańnie prapahandy ŭ navučalnych ustanovach z metaj sadziejničańnia akupacyjnym siłam.
Najbolš ciažkaje pakarańnie ŭvodzicca za:
— dobraachvotnaje zajmańnie kirujučych pasad u «niezakonnych orhanach ułady» na akupavanych terytoryjach i za praviadzieńnie tam «niezakonnych vybaraŭ i refierendumaŭ» (5-10 hadoŭ pazbaŭleńnia voli);
— za arhanizacyju palityčnych mierapryjemstvaŭ i infarmacyjnaj dziejnaści ŭ padtrymku akupantaŭ (10-12 hadoŭ);
— za dobraachvotnaje zajmańnie pasad u stvarajemych na akupavanych terytoryjach «niezakonnych sudovych abo pravaachoŭnych orhanach» (10-15 hadoŭ).
Kali takija dziejańni pryviali da hibieli ludziej abo inšych ciažkich nastupstvaŭ, jany mohuć karacca 15 hadami pazbaŭleńnia voli abo pažyćciovym terminam.