Не прайшла пераатэстацыі адвакатка Марыя Колесава-Гудзіліна
«У Чысты чацвер кваліфікацыйная камісія Міністэрства юстыцыі Рэспублікі Беларусь не атэставала мяне. Дзякуй», — напісала адвакатка ў сацсетках.
21.04.2022 / 22:00
Марыя Колесава-Гудзіліна. Фота: kolesovahudz / Twitter
Марыя — абаронца шэрагу фігурантаў палітычных спраў, у тым ліку Эдуарда Пальчыса, Яўгена Юшкевіча, Дзмітрыя Папова.
Увогуле «зачыстка» адвакацкай супольнасці адбываецца з 2020 года, за гэты час пазбаўленыя ліцэнзій дзясяткі сумленных адвакатаў, якія баранілі палітвязняў.
Падобна на тое, што надалей падобная практыка будзе толькі пашырацца. Бо акурат сёння Аляксандр Лукашэнка на сустрэчы з міністрам юстыцыі выказаўся пра тое, якой ён бачыць адвакатуру:
«Адвакат павінен выконваць свае функцыі, не баючыся нічога, але ў той жа час мы павінны разумець, што гэта дзяржаўны чалавек. І яго дзеянні павінны быць заснаваныя на нормах закона, а не нейкіх прыдуманых нормах — свабоды слова і іншых свабод. Мы ўжо наеліся гэтай свабоды. Дзякуй богу, убачылі, якую свабоду нам сюды нясуць».