Байдэн падпіша ленд-ліз для Украіны 9 мая. Апошні раз такое было для барацьбы з гітлерызмам
06.05.2022 / 21:25
Паддоны з боепрыпасамі для Украіны ў транспартным самалёце. Фота ВПС ЗША.
Прэзідэнт Злучаных Штатаў Джо Байдэн падпіша закон аб ленд-лізе для Украіны 9 мая.
Пра гэта заявіла прэс-сакратарка Белага дома Джэн Псакі падчас размовы з журналістамі на борце прэзідэнцкага самалёта.
«У панядзелак прэзідэнт падпіша Закон аб ленд-лізе для абароны дэмакратыі ва Украіне на 2022 год», — сказала Псакі.
Падобны закон прыняты ў ЗША першы раз з часоў Другой сусветнай вайны. Тады пры яго дапамозе падтрымліваўся СССР, і гэтая дапамога стала адной з фактараў ягонай перамогі над нацысцкай Германіяй.