Prakuror Viciebska daŭ pakazańni na načalnika SK. Pad sud pajšli abodva — redkaja historyja
U Viciebskim abłasnym sudzie siońnia pačaŭsia sud nad byłym načalnikam Viciebskaha haradskoha addzieła Śledčaha kamiteta Andrejem Ščarbakovym. U toj ža čas užo miesiac u Viarchoŭnym sudzie sudziać niadaŭniaha prakurora Viciebska Juryja Ramanoŭskaha. Hetaja para prajaviła siabie ŭ chodzie zadušeńnia narodu ŭ 2020-m, ale sama prakałołasia ŭ atmasfiery «niedazakonnaści».
11.05.2022 / 19:08
Abodvuch sudziać pa artykułach 426 č.3 (Pieravyšeńnie ŭłady abo słužbovych abaviazkaŭ, ad 3 da 10 hod), i 425 č.3 (Biaździeiańnie adkaznaj asoby, ad 2 da 7 hod).
Ab pryhodach staršaha savietnika justycyi Juryja Ramanoŭskaha «Naša Niva» pisała ŭžo raniej. Jaho karjery pieraškodziŭ łoś.
Juryj Ramanoŭski
Siabry eks-prakurora zabili łasia, na jakoha ŭ tyja dni nielha było palavać. A Ramanoŭski nie toje što nie zavioŭ na ich kryminalnuju spravu, ale i jeŭ łasia razam ź imi, što ŭ vyniku stała viadoma vyšejšamu načalstvu ŭ Minsku.
Pa našaj infarmacyi, dasłanaja Andrejem Šviedam pravierka zaśpieła Ramanoŭskaha ŭ stanie, jaki nielha nazvać pracoŭnym (a kankretna havorać, što prakuror zjaviŭsia na rabocie tolki paśla abiedu i pjany), paśla čaho jaho i zvolnili. A praz niekalki miesiacaŭ, vosieńniu 2021-ha, aryštavali.
Udzieł hałoŭnaha viciebskaha śledčaha Ščarbakova ŭ hetaj historyi da hetaha momantu byŭ nieviadomy.
Andrej Ščarbakoŭ
Ale, akazvajecca, što ŭ chodzie śledstva Ramanoŭski daŭ pakazańni na svajho kalehu.
Vyjaviłasia, što kiraŭniki haradskich orhanaŭ justycyi ŭvajšli ŭ zmovu i pakryvali adnaho z «udarnych» śledčych viciebskaha SK (pa sumiaščalnictvie — syna suddzi).
Vyjaviłasia, što toj pisaŭ za padazravanych pratakoły i za ich ža raśpisvaŭsia, paśla čaho hetyja falsifikavanyja spravy išli ŭ sud.
Jość i inšyja momanty, ale farmalna, jak viadoma «Našaj Nivie», hetaj pary pastavili ŭ vinu ŭtojvańnie infarmacyi ab falsifikacyjach. Za heta i sudziać.