I kałonija, i štraf: vyniki suda za abrazu prezidenta, hienprakurora i staršyni CVK
Sud Pieršamajskaha rajona Minska 16 červienia vynies prysud Alaksieju Vialešku, jaki abvinavačvaŭsia ŭ abrazie pradstaŭnika ŭłady (art. 369) i abrazie prezidenta (č.1 art. 368 Kryminalnaha kodeksa).
17.06.2022 / 13:44
Spravu razhladaŭ suddzia Alaksandr Siarhiej, paviedamlaje «Viasna».
Alaksiej Vialeška — uradženiec Salihorska, skončyŭ fakultet prykładnoj matematyki BDU.
Pa materyjałach śledstva, Vialeška z krasavika pa žnivień 2021 hoda raźmiaściŭ u internecie abraźlivyja kamientaryi na adras Łukašenki, a taksama staršyni Centrvybarkama i hienieralnaha prakurora ŭ suviazi z vykanańniem imi słužbovych abaviazkaŭ. Ekśpiertyza vyjaviła ŭ kamientaryjach «nienarmatyŭnuju formu maŭlenčaha vykazvańnia».
Svaju vinu minčanin pryznaŭ u poŭnym abjomie. Pakazaŭ, što ździejśniŭ supraćpraŭnyja dziejańni pad upłyvam emocyj i paśla čytańnia infarmacyi ŭ destruktyŭnych Telegram-kanałach.
Abvinavačany kampiensavaŭ zajaŭleny hienprakuroram Andreem Šviedam hramadzianski isk ab materyjalnym pakryćci maralnaj škody ŭ pamiery 10 tysiač rubloŭ.
Sud pryznaŭ Vialešku vinavatym i pryznačyŭ pakarańnie ŭ vyhladzie pazbaŭleńnia voli ŭ kałonii ahulnaha režymu terminam na dva hady i štrafu ŭ pamiery 3200 rubloŭ (100 b.v.).