Novy kiraŭnik brytanskaha Hienštaba: My — pakaleńnie, jakoje pavinna znoŭ padrychtavać armiju da vajny ŭ Jeŭropie
Novapryznačany kiraŭnik Hienštaba Vialikabrytanii, hienierał Patryk Sanders zajaviŭ pra nieabchodnaść rychtavać armiju da supraćstajańnia z Rasijaj u Treciaj suśvietnaj vajnie. Hienierała cytuje The Independent.
19.06.2022 / 19:27
Hienierał Patryk Sanders
U svaim pieršym zvarocie da vajskoŭcaŭ Sanders raskazaŭ pra pahrozy, jakija ŭźnikli na fonie ŭvarvańnia Rasii va Ukrainu. Hienierał nie vyklučyŭ pačatku Treciaj suśvietnaj vajny i zajaviŭ, što brytanskaja armija pavinna być hatovaja «vajavać u Jeŭropie».
«Ciapier vielmi nieabchodna stvaryć vojska, zdolnaje zmahacca razam z našymi sajuźnikami i pieramahčy Rasiju ŭ bai. My — pakaleńnie, jakoje pavinna znoŭ padrychtavać armiju da vajny ŭ Jeŭropie», — skazaŭ Sanders.
Jon dadaŭ, što jaho hałoŭnaja meta — uzmacnieńnie vojska i padrychtoŭka da bajoŭ na sušy. Taksama Sanders paabiacaŭ paskoryć madernizacyju armii:
«Moj vyklučny abaviazak — zrabić našu armiju nastolki śmiertanosnaj i efiektyŭnaj, nakolki heta mahčyma».
56-hadovy hienierał Patryk Sanders zastupiŭ na pasadu hałoŭnakamandujučaha brytanskaj armijaj 13 červienia.
A jašče raniej premjer Vialikabrytanii Borys Džonsan zaklikaŭ rychtavacca da zaciažnoj vajny, bo prezident Rasii Uładzimir Pucin pierajšoŭ da «vajennaj kampanii na źniasileńnie». U suviazi z hetym jon prapanavaŭ płan padtrymki Ukrainy z čatyroch punktaŭ.
U pryvatnaści, Džonsan zaklikaŭ zabiaśpiečyć Ukrainu ŭzbrajeńniem, bojeprypasami i ryštunkam, a taksama akazać joj finansavuju dapamohu. Akramia taho, jon zajaviŭ pra nieabchodnaść arhanizacyi suchaputnych maršrutaŭ dla ŭkrainskaha ekspartu i namier razbłakavać ukrainskija marskija party.