«Забрала ўсе грошы і знікла». Ад бацькі матроса, які загінуў на крэйсеры «Масква», збегла жонка
Бацька расійскага матроса тэрміновай службы, які загінуў на крэйсеры «Масква», Дзмітрый Шкрабец спачатку заявіў пра знікненне жонкі, але неўзабаве паведаміў, што яна проста збегла, прыхапіўшы ўсе грошы. Верагодна, гаворка ідзе пра 7 мільёнаў рублёў (каля 133 000 даляраў) дзяржаўнай кампенсацыі за забітага на вайне сына.
03.07.2022 / 00:36
Дзмітрый Шкрабец і яго сын Ягор. Фота vk.com/d.vetrov
Сваёй гісторыяй Шкрабец падзяліўся ў сацсетках.
Раніцай жанчына пайшла на працу, з ёй знікла сувязь. Дзмітрый забіў трывогу, заяўляючы пра пагрозы, якія ён нібыта атрымліваў з-за асвятлення тэмы ўдару па «Маскве».
Пасля мужчына напісаў, што яго жонка «забрала ўсе грошы і знікла, сім-карты адключаныя».
«Вось такое маё жыццё, здраджваюць самыя блізкія», — наракае Дзмітрый.
Акрамя таго, Шкрабец згадаў «прарочы сон» пасля знаёмства з жонкай. Яго нібыта папярэджвалі пра «страшныя часы пасля смерці сына».
Дзмітрый Шкрабец адным з першых публічна распавёў пра страты на крэйсеры «Масква». Нядаўна да яго прыйшлі «людзі з сур'ёзнага ведамства» і забралі ноўтбук нібыта на экспертызу.