Niešta adbyvajecca sa Statusbankam. Tudy pierabiahaje mieniedžmient z pamierłaha Absalutbanka
Jak stała viadoma «Našaj Nivie», u biznes-kołach abmiarkoŭvajuć mierkavany prodaž Statusbanka nabližanamu da Alaksandra Łukašenki bizneśmienu Mikałaju Vierabju. Ab žadańni papiarednich ułaśnikaŭ pazbavicca niaprofilnaha aktyvu było viadoma daŭno. Miarkujecca, što Vierabiej užo staŭ bienieficyjaram, hałoŭny ŭskosny dokaz — masavaje pierabiahańnie mieniedžaraŭ padsankcyjnaha i pamierłaha Absalutbanka ŭ Statusbank. Ci vałodaje Varabiej Statusbankam naŭprost, ci praz «Funta» — nieviadoma. Niadaŭna ŭkazam Łukašenki bankam dazvolili nie raskryvać infarmacyi ab składzie akcyjanieraŭ.
07.07.2022 / 14:30
Absalutbank Vierabja trapiŭ pad amierykanskija sankcyi 9 žniŭnia 2021 hoda, roŭna praz hod paśla sfalsifikavanych vybaraŭ. Insajdary śćviardžajuć, što praz Absalutbank chadzili mutnyja hrošy, zaroblenyja na kantrabandzie i schiematozach. Siarod kłijentaŭ byŭ i Viktar Miedźviadčuk.
Paśla ŭviadzieńnia sankcyj z banka vynieśli dźvie treci srodkaŭ, a sam jon pierastaŭ absłuhoŭvacca karespandujučymi bankami i nieŭzabavie pamior. Ciapier reštki banka pieraŭtvarylisia ŭ niabankaŭskuju kredytna-finansavuju arhanizacyju «OptyKurs».
Ale, jak viadoma «Našaj Nivie», bizneśmien Vierabiej znajšoŭ novy bank dla praviadzieńnia svaich apieracyj. U bankirskich kołach papularnaja čutka pra toje, što niadaŭna jon staŭ bienieficyjaram Statusbanka (pa inšaj viersii, uhoda voś-voś adbudziecca).
Detali ŭhody nieviadomyja, vykazvajecca zdahadka, što Vierabiej zachodzić tudy praz «Funta» — naminalnaha, ale nie realnaha bienieficyjara, jaki ŭ realnaści padkantrolny Vierabju. Mienavita takuju viersiju «Našaj Nivie» ahučyli abaznanyja krynicy z bankaŭskich kołaŭ. U pacvierdžańnie słovaŭ ukazvajecca na toje, što mieniedžarskija kadry byłoha Absalutbanka masava pieravodziacca ŭ Statusbank.
Pra Statusbank viadoma toje, što jon naležaŭ ułaśnikam «Jeŭraopta», ale apošnija hady jany nieadnarazova dekłaravali namier pazbavicca niaprofilnaha aktyvu i viali pieramovy z roznymi patencyjnymi kupcami, siarod jakich byŭ i Mikałaj Vierabiej.
Mikałaj Vierabiej — adna z centralnych fihur bujnoha łukašenkaŭskaha biznesu z dostupam da zakrytaha dla inšych bizneśmienaŭ naftavaha siektaru, udzielnik tryumviratu, u jaki ŭvachodziać taksama Alaksiej Aleksin i Alaksandr Zajcaŭ.
Ličycca, što Vierabiej adzin z pradstaŭnikoŭ hetak zvanych «bizneśmienaŭ udačy», jakija abaviazanyja svaim pośpiecham ilhotam i prefierencyjam z boku Alaksandra Łukašenki.
Vierabiej trapiŭ pad sankcyi ZŠA i ES, paśla čaho pačaŭ pierapisvać doli svaich biznesaŭ na top-mieniedžaraŭ.