Як у Гомелі ратавалі затанулую лох-нескую пачвару
У Гомелі правялі выратавальную аперацыю па выцягванні з Валатоўскага возера шасціметровай скульптуры «Валатазаўрыка», якая затанула ўчора днём, пішуць «Сильные новости».
05.08.2022 / 17:02
Паводле інфармацыі відавочцаў, спачатку на дапамогу дыназаўру прыйшлі вадалазы Таварыства выратавання на вадзе. Затым пад скульптуру падсунулі надзіманыя падушкі і перамясцілі яе бліжэй да берага.
На фінальным этапе выратавальнай аперацыі задзейнічалі пад’ёмны кран, які выцягнуў дыназаўра на бераг.
Плывучую скульптуру плезіязаўра ўстанавілі ўчора на Валатаўскім возеры ў Гомелі, аднак яна не пратрымалася і паўдня. Праз некалькі гадзін уся канструкцыя пайшла пад ваду. Аказалася, што ў адным з паплаўкоў, якія трымаюць скульптуру на вадзе, быў няспраўны кран. З-за гэтага дыназаўр нібыта і пайшоў пад ваду.