Lehiendarnaja tenisistka Sierena Uiljams u 40 hadoŭ zaviaršaje kar’jeru
Na dniach Sierena Uiljams, adna z samych znakamitych tenisistak sučasnaści, abviaściła pra chutkaje zaviaršeńnie kar’jery. 23-kratnaja pieramožca turniraŭ Vialikaha šlema i čatyrochkratnaja alimpijskaja čempijonka abiacaje syści z tenisa paśla turniru US Open.
11.08.2022 / 17:42
Fota: AR
Pra svaje płany Uiljams raspaviała ŭ vieraśniovym vypusku časopisa Vogue, jaki z’iaviŭsia ŭ anłajn-prodažy 9 žniŭnia. Spartśmienka raskazała, što sychodzić z tenisa, kab zaniacca bolš važnymi dla siabie rečami, u tym liku pracaj z ułasnaj vienčurnaj kampanijaj i siamiejnymi spravami. Svoj sychod sa sportu Sierena nazyvaje evalucyjaj, piša New York Times.
Nie ŭsie vierać u toje, što Uiljams chutka pakinie tenis, ale ž US Open — vielmi važny dla jaje turnir, tamu i nie dziva, što tenisistka vyrašyła zrabić jaho apošnim spabornictvam u kar’iery. Jana 6 razoŭ pieramahała na im u adzinočnym razradzie, pieražyła na im i adny z najhoršych momantaŭ u kar’iery — naprykład, kanflikty z suddziami i arhanizatarami turniru ŭ paŭfinale 2009 hoda i finale 2018 hoda.
Užo amal hod Sierenu praśledujuć nastupstvy razryvu suchažyłla — hetuju traŭmu lehienda atrymała na minułahodnim Uimbłdonie. Za hety čas z vialikich turniraŭ jana z’iaviłasia chiba što na Uimbłdonie, dzie prajhrała ŭ pieršym ž raŭndzie. Tenisistka paviedamlała, što chacieła b znoŭ zaciažaryć, ale nie žadaje pieražyvać ciažarnaść u statusie spartśmienki.
Za ŭsiu kar’ieru Uiljams atrymała kala 100 miljonaŭ dalaraŭ pryzavych, a taksama vyjhrała 73 turniry ŭ adzinočnym razradzie, 23 — u parnym, 2 — pamiž źmiešanymi parami. Jana pryniała ŭdzieł u čatyroch alimpijadach i zdabyła na ich čatyry załatyja miedali. Što da jaje ŭpłyvu na tenis, Sierena šmat zrabiła, kab źmianić staŭleńnie da žanočaha sportu, źniščyć roźnicu pamiž elitnym mužčynskim i žanočym tenisam i natchnić najlepšych tenisistaŭ sučasnaści. Pra jaje ŭpłyŭ na siabie kazała i 18-hadovaja ŭzychodziačaja zorka tenisa Koka Haŭf, i vialikija tenisisty Rafael Nadal, Rodžer Fiederer i Novak Džokavič.