Prarasijskaha aktyvista sudziać u Vilni za kpiny z biełarusaŭ
Prarasijski aktyvist Łaŭrynas Rahielskis paŭstaŭ pierad sudom u Vilni pa abvinavačvańni ŭ raspalvańni varožaści i apahańvańni miemaryjała ŭ pamiać ab achviarach biełaruskaha pratestu, piša Delfi.
28.08.2022 / 15:19
Fota: DELFI / Andrius Ufartas
Zhodna z materyjałami spravy, u kastryčniku 2020 hoda Rahielskis kala ambasady na vulicy Mindoŭha ŭ Vilni
zdymaŭ videa, padčas hetaha kpiŭ z hrupy ludziej i vykłaŭ zapis u sacyjalnyja sietki. Taksama padazrajuć, što Rahielskis kpiŭ z udzielnikaŭ akcyi pratestu la ambasady Biełarusi i apahaniŭ miemaryjał u pamiać ab zahinułych — partrety zahinułych ad ruk režymu.
«Ja pa-litoŭsku nie razumieju, ja nie razumieju abvinavačvańnia, ja lepš razumieju pa-rusku», — skazaŭ jon na pasiadžeńni suda pa-rusku, choć sa SMI i inšymi ludźmi ŭ zale pasiadžeńnia havaryŭ pa-litoŭsku.
Jon zajaviŭ u sudzie, što zjaŭlajecca biełarusam.
Suddzia Mirasłaŭ Hvazdovič vyklikaŭ u zału pierakładčyka.
Rahielskis spačatku zajaviŭ, što jamu nie ŭ toj formie padali dakumienty, potym skazaŭ, što ŭ jaho niama advakata. Na pasiadžeńnie suda ź im pryjšła pracaŭnica Biełaruskaj abščyny Halina Šymanovič.
Suddzia dazvoliŭ abvinavačanamu znajści advakata i pieranios pasiadžeńnie na 26 vieraśnia. Paśla zakančeńnia pasiadžeńnia Rahielskis znoŭ zahavaryŭ pa-litoŭsku.
Rahielskisa ŭ svaim dakładzie ab pahrozach nacbiaśpieki Litvy zhadvaŭ Departamient dziaržbiaśpieki krainy. Pavodle źviestak vyviedki, hety čałaviek «kuryruje antyzachodnija i prarasijskija artykuły na płatformie na litoŭskaj movie», paviedamlaje Ldiena.lt.