Žychara Hrodna asudzili na čatyry hady za «zakliki da sankcyj»
U Hrodzienskim abłasnym sudzie 12 vieraśnia ahučyli prysud 52-hadovamu palitviaźniu Ryhoru Hryhu — čatyry hady kałonii va ŭmovach ahulnaha režymu. Jaho zatrymali 29 vieraśnia minułaha hoda ŭ Hrodnie pa tak zvanaj «spravie Zielcera».
12.09.2022 / 15:26
Padčas jaho ŭtrymańnia pad vartaj Ryhoru vystavili abvinavačvańnie jašče ŭ abrazie Łukašenki i zaklikach da sankcyj. Prysud vynies suddzia Mikałaj Račynski, paviedamlaje «Viasna».
Adrazu jamu vystavili abvinavačvańnie pavodle art. 369 Kryminalnaha kodeksa (abraza pradstaŭnika ŭłady) i art. 130 KK (raspalvańnie inšaj sacyjalnaj varožaści). Ale za čas śledstva jamu vystavili abvinavačvańnie jašče pa dvuch artykułach Kryminalnaha kodeksa: č. 3 art. 361 KK (zakliki da dziejańniaŭ, skiravanych na pryčynieńnie škody nacyjanalnaj biaśpiecy Respubliki Biełaruś) i č. 1 art. 368 (abraza Łukašenki), a art. 369 KK źniali.
Ryhora zatrymali 29 vieraśnia minułaha hoda ŭ Hrodnie pa kryminalnaj spravie, zaviedzienaj za kamientaryi ŭ internecie paśla hibieli ŭ minskaj kvatery IT-śpiecyjalista Andreja Zielcera i supracoŭnika KDB Dźmitryja Fiedasiuka.