У адказ на зварот армянаў Беларусь прапанавала выезд генсака АДКБ для падрыхтоўкі даклада
Прэс-служба Лукашэнкі паведаміла, што сёння абмяркоўвалася і якія рашэнні прынятыя на пазачарговым пасяджэнні Рады калектыўнай бяспекі АДКБ. Яно адбылося сёння ўвечары па ініцыятыве Арменіі, якая ўначы падвергнулася абстрэлу сваёй тэрыторыі з боку суседняга Азербайджана.
13.09.2022 / 21:43
Генеральны сакратар АДКБ Станіслаў Зась
Паводле сціслага афіцыйнага паведамлення, па даручэнні Лукашэнкі пазіцыю Беларусі паплечнікам па АДКБ давёў дзяржсакратар беларускай Рады бяспекі Аляксандр Вальфовіч. Ён сказаў, што наша краіна, маўляў заўсёды выступала за азербайджанска-армянскае ўрэгуляванне выключна палітыка-дыпламатычнымі метадамі, а цяперашняя сітуацыя патрабуе дасканалага вывучэння.
У выніку прапанаваны такі моцны крок рэакцыі на падзеі ў паўднёвакаўказскім рэгіёне, як выезд генеральнага сакратара АДКБ — цяпер гэтую пасаду займае беларус Станіслаў Зась — у зону канфлікту для падрыхтоўкі падрабязнага дакладу кіраўнікам дзяржаў.
У дадатак да таго прапанавана стварыць працоўную групу з ліку супрацоўнікаў сакратарыята і аб'яднанага штаба АДКБ для аналізу сітуацыі і выпрацоўкі прапаноў.