Затрымалі арганізатара квізаў «Футбольныя войны». Яго абвінавачваюць у тым, што пісаў у «Нехту» і дарыў кубкі з Пагоняй
Квіз меў некалькі філіялаў у Беларусі.
05.10.2022 / 12:27
Фота: сацсеткі
Максім Чэрнікаў арганізоўваў адзіны ў Беларусі футбольны паб-квіз «Футбольныя войны» цягам трох гадоў. Паб-квіз — гэта від віктарын (як «Што? Дзе? Калі?»), падчас якога людзі збіраюцца ў пабе ці вялікай кавярні, рэгіструюць каманды і адказваюць на пытанні.
Максім распавядаў у ранейшых інтэрв'ю, што выношваў ідэяю стварэння квіза некалькі гадоў, а ў 2019-м вырашыў запусціць яго. Толькі ў Мінску прайшло 76 гульняў.
Сілавікі закідаюць Максіму тое, што ён пісаў у бот «Нехты» і ў якасці прызоў раздаваў кубкі з Пагоняй. Таксама мужчыну вінавацяць, што падчас некаторых квізаў у пабах віселі бела-чырвона-белыя сцягі.