Як цяпер выглядае ўкраінска-беларуская мяжа ў Ровенскай вобласці
На ўчастку ўкраінска-беларускай мяжы ў Ровенскай вобласці пабывалі журналісты ўкраінскага тэлеканала «Суспільне». З іх рэпартажу можна ўявіць, як выглядае ўкраінскі бок мяжы цяпер. Фартыфікацыйныя работы па ўмацаванні вядуцца там поўным ходам.
16.11.2022 / 20:01
Дзяржаўную мяжу з Беларуссю на тэрыторыі Ровеншчыны ўзмацняюць дадатковымі фартыфікацыйнымі збудаваннямі і ўзводзяць ахоўны плот. Пра гэта 16 лістапада паведаміў начальнік мясцовай абласной вайсковай адміністрацыі Віталь Коваль.
Якія менавіта зоны маюць патрэбу ва ўзмацненні, вызначаюць разам з вайсковым кіраўніцтвам. «Штодня выкарыстоўваем для ўмацавання самой тэрыторыі некалькі фарматаў ахоўных збудаванняў — гэта і супрацьтанкавыя равы, і зоны мініравання. Сумесна з вайсковым кіраўніцтвам вызначаем тыя зоны, якія будуць умацаваныя ахоўнымі платамі», — адзначыў старшыня АВА.
Ахова дзяржаўнай мяжы з Беларуссю на Ровеншчыне, а гэта 218 кіламетраў, праводзіцца па ўзмоцненым варыянце.
«На ўкраінска-беларускай мяжы ўсё спакойна. Ніякай бачнай пагрозы з боку Беларусі мы не бачым. Тут пануе спакой і засяроджанасць вайскоўцаў. Сёння сітуацыя больш стабілізаваная, чым за ўвесь час поўнамаштабнай вайны Расіі супраць Украіны. Гэта тычыцца і ўкамплектавання войскаў, і наяўнасці ўзбраення, і асабовага складу», — дадаў Віталь Коваль.