Jak źmianiŭsia rejtynh telepieradač, jakija kruciać u Biełarusi, z pačatku vajny? Zajmalnaja karcina
Za 9 miesiacaŭ poŭnamaštabnaj vajny Rasii suprać Ukrainy biełarusy, jakija hladziać telebačańnie, stali mieniej sačyć za vypuskami navin na prapahandysckich kanałach. Svaju ŭvahu jany pieraklučyli na zabaŭlalnyja prahramy.
08.12.2022 / 20:43
Fota: Sergei Gapon /AFP / EAST NEWS
Takija vysnovy možna zrabić pry paraŭnańni taho, jak vyhladała situacyja z papularnaściu teleprahram na pačatku vajny i ŭ kancy listapada.
Zamiaraje aŭdytoryju telekanałaŭ kampanija «MiedyjaVymiaralnik». Jana vyvučaje situacyju na miedyjarynku i składaje ŭ tym liku top-15 samych rejtynhavych telepieradač.
Što pakazała daśledavańnie hladackich pieravah z 28 lutaha pa 6 sakavika
U top-15 telepieradač «čystyja» vypuski navin tady zajmali pieršyja čatyry miescy.
Lidaram była prahrama «Siehodnia» na kanale «NTB-Biełaruś» a 19-j hadzinie.
«Viesti» ad «Rasii-Biełaruś», jakija pieradavali a 17-j hadzinie, byli na druhim miescy. Viačernija «Naši novosti» ad ANT — na trecim.
Skrynšot: spravazdača kampanii «MiedyjaVymiaralnik»
Na čacviortym radku — «Novosti-Biełaruś», jakija pakazvali ŭ 16:50 na telekanale «Rasija-Biełaruś».
Piatuju pazicyju na pačatku vajny zajmali «Itohi niediełi s Iradoj Ziejnałovoj» na kanale «NTB-Biełaruś».
Ahułam prahramy pra palityku (vypuski navin i prapahandysckija tok-šou) zajmali 12 z 15-ci pazicyj u topie.
Z zabaŭlalnych pieradač najbolšy rejtynh siarod biełaruskich hledačoŭ mieła tok-šou «Priviet, Andriej!» z Andrejem Małachavym, jakoje tranślavaŭ kanał «Rasija-Biełaruś». Jano ŭ topie na šostym miescy. Hladzieli taksama sieryjał «Pios-5» i prahramu «Śledstviie viełi» (i toje, i toje — kanał «NTB-Biełaruś»).
Pieradačy z navinami ci ich abmierkavańniem byli ŭ topie i na kožnym infarmacyjna-palityčnym kanale paasobku (aproč telekanała «Mir»).
Što zafiksavała daśledavańnie hladackich pieravah z 21 pa 27 listapada
Lidarstva ŭ topie zachapili zabaŭlalnyja pieradačy.
«Priviet, Andriej!» staŭ samaj rejtynhavaj pieradačaj u apošni tydzień listapada.
«Piesni ot vsiej duši», jakija pieradavaŭ kanał «Rasija-Biełaruś», vyskačyli na druhoje miesca. Prahrama «Supierstar. Vozvraŝieniie» na kanale «NTB-Biełaruś» zaniała treci radok.
Skrynšot: spravazdača kampanii «MiedyjaVymiaralnik»
Z navin najlepšy rejtynh mieli «Viesti niediełi» ad «Rasija-Biełaruś» — čacviorty radok u topie.
A zamykaje piaciorku lidaraŭ «Pole čudies» na ANT.
Vypuski navin i inšyja pieradačy pra palityku zaniali tolki piać radkoŭ z 15-ci ŭ topie.
Kali hladzieć papularnyja pieradačy dla kožnaha infarmacyjna-palityčnaha kanała asobna, to naviny na pieršym miescy tolki na STB.
U Rasii prapahandysckija pieradačy vylecieli navat z top-50
Rasijskija telehledačy praktyčna admovilisia ad prahladu prapahandysckich tok-šou, pieraklučyŭšysia na zabaŭlalny kantent, piša telehram-kanał «Možiem ob'iasnit» sa spasyłkaj na danyja kampanii «Miedyjaskop».
U pieršy tydzień śniežnia samaj papularnaj prahramaj stała tranślacyja futbolnaha matča pamiž Francyjaj i Polščaj na čempijanacie śvietu. U dziasiatku patrapili jašče try futbolnyja tranślacyi, a taksama «Novaja bitva ekstrasensaŭ».
U toj ža čas tok-šou prapahandystaŭ Volhi Skabiejevaj i Jaŭhiena Papova «60 minut» zaniało tolki 62-je miesca ŭ topie samych papularnych teleprahram. A padobnyja prahramy «Vriemia pokažiet», «Viečier s Vładimirom Sołovievym», «Miesto vstrieči» ŭvohule nie ŭvajšli ŭ sotniu lepšych, choć raniej rasijanie ich hladzieli z zadavalnieńniem.