Mbape i Miesi, vialiki dvuboj u finale. Takija mocnyja futbalisty, takija roznyja ludzi
Siońnia projdzie finał futbolnaha čempijanatu śvietu, na jakim sustrenucca Francyja i Arhiencina (pačatak u 18:00 pa Minsku). Lidary abiedźviuch zbornych, Kilijan Mbape i Lijaniel Miesi, naležać da najlepšych futbalistaŭ płaniety, tamu nas čakaje zachaplalny dvuboj hienijaŭ.
18.12.2022 / 17:51
Kałaž z fotaŭ: AR
Miesi: samatatrapin, aŭtyzm i troje dziaciej
- Znakamity arhienciniec naradziŭsia ŭ siamji pracaŭnika staleliciejnaha zavoda i prybiralščycy. Padčas jaho malenstva ŭ Arhiencinie bušavaŭ ciažki ekanamičny kryzis, i baćki Miesi, jak i inšyja suajčyńniki, dumali kudyści emihravać, naprykład, u Aŭstraliju.
- Lijaniel maje jeŭrapiejskija karani. Rod jaho baćki pachodzić ź italjanskaha horada Rekanaci, i adtul jaho prodak, Andžeła Miesi, emihravaŭ u Arhiencinu ŭ 1883 hodzie. Inšyja jaho prodki rodam z Katałonii, u tym liku i prapradzied Ramon Ljabiera Pieres. Brat Ramona, Hansal Ljabiera Pieres, prapradzied inšaha viadomaha futbalista — Bajana Krkiča.
- Kali Miesi było 11 hadoŭ, u jaho vyjavili duža redkuju chvarobu — deficyt samatatrapinu (harmonu rostu). Kab vylečyć jaho, chłopcu daviałosia na praciahu troch hadoŭ štodzień rabić sabie injekcyi śpiecyjalnaha preparata, jakija kaštavali kala 900 dalaraŭ na miesiac. Napačatku leki apłačvaŭ staleliciejny zavod, dzie pracavaŭ tata Miesi, ale, kali zdaryŭsia kryzis, kasa ŭzajemadapamohi zavoda pierastała heta rabić. Admoviŭsia dapamahać i viadomy arhiencinski kłub «Ryvier Płejt», choć jaŭna talenavitaha chłapčuka jany na toj čas užo zaŭvažyli. Na ščaście, Lijaniela pažadali bačyć u «Barsiełonie», i ŭžo katałoncy ŭziali na siabie jaho lačeńnie. U vyniku chłopiec vyras da 169 santymietraŭ — heta siaredni rost mužčyn u Arhiencinie.
Hetaje fota i nastupnyja: commons.wikimedia.org
- Lijaniel — sapraŭdny patryjot. Tak, jon z 13 hadoŭ žyvie nie ŭ Arhiencinie, a ŭ Ispanii, kudy pierabraŭsia sa svajoj siamjoj, kab budavać futbolnuju karjeru i vučycca ŭ futbolnaj akademii «Barsiełony». Ale ž svaju krainu jon nie zabyvaje: «Arhiencina — heta maja kraina, maja siamja. Ja b abmianiaŭ usie svaje rekordy na toje, kab zrabić ludziej u majoj krainie ščaślivymi».
- Miesi addany nie tolki Arhiencinie, ale i «Barsiełonie» — hałoŭnamu kłubu ŭ svaim žyćci. Za jaje moładzievy skład Lijaniel hulaŭ z 2000 pa 2003 hod, a nastupnyja 18 hadoŭ pravioŭ u darosłaj kamandzie «Barsy». U 2021 hodzie jon navat pahadziŭsia panizić zarobak udvaja, tolki kab padpisać novy kantrakt z rodnym kłubam, ale abmiežavańni ad Ła Lihi nie dali heta zrabić, i arhiencincu daviałosia pakinuć kłub. Na pres-kanfierencyi, dzie Miesi pra heta abviaščaŭ, jon płakaŭ.
- Viadoma, što arhienciniec maje lohkuju formu aŭtyzmu, tak zvany sindrom Aśpierhiera. U adroźnieńnie ad bolš ciažkich form chvaroby, hety sindrom nie škodzić intelektualnym zdolnaściam, a, pa niekatorych mierkavańniach, naadvarot, dapamahaje Lijanielu lepš kancentravacca na hulni i praličvać dziejańni praciŭnikaŭ napierad. Pryniata ličyć, što ŭ ludziej ź sindromam Aśpierhiera jość prablemy z sacyjalnym uzajemadziejańniem, i znajomyja sapraŭdy časta apisvajuć Miesi jak čałavieka panuraha.
- Futbalist — uzorny siemjanin. Jon žanaty z Antaniełaj Rakuca, svajoj staroj znajomaj ź dziacinstva, z bratam jakoj jon siabravaŭ. Miesi pačaŭ sustrakacca z Antaniełaj u 2009 hodzie, maje ad jaje troch dziaciej: 10-hadovaha Ćjahu, 7-hadovaha Matea i 4-hadovaha Čyra.
- I ŭsio-taki jon nie taki idealny, hety Miesi, i navat maje turemny termin u 21 miesiac — praŭda, umoŭny. Taki surovy prysud Lijaniel i jaho baćka, jaki pracuje futbolnym ahientam arhiencinca, atrymali za niavypłatu padatkaŭ ispanskaj kaźnie dy jašče musili vypłacić 3,5 miljona štrafaŭ. Kali b nie ispanskija zakony, što dazvalajuć adbyvać mienšy za 2 hady termin umoŭna, futbalist sapraŭdy moh by trapić na nary.
- Arhienciniec lubić pakryvać cieła tatuiroŭkami, i šmat jakija ź ich źviazanyja ź jaho žonkaj. Na ciele hulca jość vyjava voka Antanieły i jaje vusny, a taksama vialikaja vyjava Isusa na pieradpleččy, vyjava maci i šmat inšych tatuirovak.
Mbape: baćki, jakija pryśviacili siabie synu, i rekord chutkaści
- Kilijan rodam sa šmatnacyjanalnaj siamji, u jakoj sport zaŭždy byŭ na važnym miescy. Jaho mama maje ałžyrskija karani, była prafiesijnaj handbalistkaj, baćka — vychadziec z Kamieruna — dobra hulaŭ u futboł i pracavaŭ futbolnym trenieram.
- Chłopcu było šeść hadoŭ, kali jon pačaŭ zajmacca futbołam u kłubie «Bandzi», u jakim pracavaŭ jaho baćka. Spačatku Kilijan treniravaŭsia ŭ taty, a potym pierajšoŭ u viadomuju akademiju «Klerfanten» — adtul vychodzili takija zorki, jak, naprykład, Ćjery Anry. Da akademii davodziłasia jeździć za dziasiatki kiłamietraŭ, ale baćka ŭsio adno kožny dzień vaziŭ Kilijana.
- Zaprašeńnie hulać pad kiraŭnictvam Zidana — mara, napeŭna, kožnaha futbalista. Ale Mbape, kali jamu było 13, admoviŭsia pryniać hetaje samaje zaprašeńnie ad ispanskaha «Reała». I praciahnuŭ karjeru ŭ składzie «Manaka».
- Jak i šmat chto z futbalistaŭ, Kilijan maje mianušku. U jaho vypadku heta Danateła — imia adnaho z hierojaŭ multfilma «Čarapaški-nindzia», da jakoha Mbape nibyta padobny. Takuju mianušku chłopcu dali adnakłubniki pa «Pary Sen-Žermien», jaho ciapierašniaj kamandzie.
- Kilijanu było 19 hadoŭ, kali razam z francuzskaj zbornaj jon staŭ čempijonam śvietu. Čatyry hady tamu, na turniry ŭ Rasii, Mbape nazvali najlepšym maładym hulcom, i jon sapraŭdy vyznačyŭsia: naprykład, zabiŭ adziny hoł u hulni ź Pieru, što zabiaśpiečyła francuzam daterminovy vychad u płej-of.
- Nasamreč Kilijan moh by hulać nie za Francyju, a za Kamierun, bo jaho baćka pachodzić z hetaj krainy. Ale Kilijan sam vyrašyŭ vybrać Francyju: nichto z kamierunskich futbolnych čynoŭnikaŭ nie dadumaŭsia jaho pra heta paprasić.
- Z Mbape źviazanyja niekalki finansavych rekordaŭ u futbole. Naprykład, u lutym 2021 hoda jaho tranśfierny košt acanili na 185 miljonaŭ jeŭra, što zrabiła jaho na toj čas samym darahim futbalistam śvietu (zaraz hety košt źniziŭsia da 160 miljonaŭ). Ale ž pra Mbape viedaje mienš ludziej, čym pra Ranałdu ci Miesi. Čamu? Prosta Kilijan pa natury ścipły i niepubličny, tamu i jaho imia nie tak časta milhaje ŭ stužcy navin.
- U 2020 hodzie Mbape nazvali samym chutkim futbalistam u śviecie. Pa padlikach francuzskaha vydańnia Le Figaro, Kilijan zdolny raźvivać na poli chutkaść 36 km/hadz.