«Дачка» Cisco заявіла аб адключэнні сеткавых прылад у Расіі і Беларусі
Meraki, даччыная фірма кампаніі Cisco, заявіла аб адключэнні з 21 снежня ад воблачных сэрвісаў ўсіх сеткавых прылад амерыканскага брэнда ў Расіі і Беларусі, паведамляе рэсурс Habr.com са спасылкай на лісты, якія рассылае кампанія сваім расійскім і беларускім карыстальнікам.
18.12.2022 / 16:58
«Meraki патлумачыла, што з 21 снежня карыстальнікі ў Расіі і Беларусі не змогуць бачыць у асабістым кабінеце кампаніі свае прылады. Роўтары і пункты доступу, заточаныя на працу ў воблаку, будуць заблакаваныя на серверах Meraki па геалакацыі і перастануць атрымліваць абнаўленні прашыўкі. Кампанія патлумачыла, што дзейнічае паводле законаў ЗША і выконвае ўсе патрабаванні рэгулятараў сумесна з мацярынскай кампаніяй Cisco», — гаворыцца ў паведамленні.
Рэсурс нагадаў, што Meraki, набытая ў 2012 годзе Cisco, у канцы кастрычніка «ў аднабаковым парадку адключыла расійскіх кліентаў ад воблачных паслуг, заблакавала тыя пункты доступу, якія прададзеныя ў краіне, а таксама знаходзяцца ў фізічных асоб і вылічаныя па геалакацыі».
Аднак пазней расійскім і беларускім карыстальнікам вярнулі магчымасць доступу да воблачных паслуг Cisco. Як аказалася, часова.
23 чэрвеня Cisco вырашыла цалкам сысці з Расіі і Беларусі. Кампанія аб'явіла, што закрые ўсе прадстаўніцтвы і спыніць супрацоўніцтва з кліентамі і падтрымку. «Cisco спыняе ўсе дзелавыя аперацыі, у тым ліку продажы і аказанне паслуг у Расіі і Беларусі на блізкую будучыню», — заявілі тады ў кампаніі.