Maci i dačku, jakija pracavali ŭ MTBanku, asudzili da 7 i 6,5 hadoŭ kałonii
U Minskim haradskim sudzie 20 studzienia ahučyli prysud palitźniavolenym supracoŭnicam MTBanka Inie i Valeryi Hlinskim — 7 i 6,5 hoda kałonii va ŭmovach ahulnaha režymu adpaviedna, piša «Viasna».
20.01.2023 / 14:10
Ina i Valeryja Hlinskija
Maci i dačku asudzili nibyta za pieradaču ŭ 2020 hodzie danych siłavikoŭ u telehram-kanał «Čornaja kniha Biełarusi» pa troch artykułach Kryminalnaha kodeksa: č. 3 art 130 (raspalvańnie inšaj sacyjalnaj varožaści), č. 3 art. 203-1 (niezakonnyja dziejańni ŭ dačynieńni da infarmacyi ab pryvatnym žyćci i piersanalnych danych), art. 352 (niepravamiernaje zavałodańnie kampjutarnaj infarmacyjaj).
Prysud vyniesła suddzia Taćciana Falkoŭskaja. Bolšaść pasiadžeńniaŭ pa spravie prajšła ŭ zakrytym režymie.
Ina i Valeryja Hlinskija byli zatrymanyja 28 śniežnia 2021 hoda supracoŭnikami HUBAZiKa za toje, što ŭ žniŭni 2020-ha nibyta pieradali danyja siłavikoŭ u «Čornuju knihu Biełarusi».
«Ja pracavała ŭ MTBanku na pasadzie śpiecyjalista. U žniŭni 2020 hoda ja prymała ŭdzieł u vuličnych biesparadkach. Z vykarystańniem svaich słužbovych paŭnamoctvaŭ padavała infarmacyju pa supracoŭnikach milicyi ŭ kanał «Čornaja kniha Biełarusi», — raspaviadała na milicejskim videa Ina Hlinskaja, jakaja zajmała ŭ banku kirujučuju pasadu.
U sudzie palitźniavolenyja całkam pryznali vinu pa dvuch artykułach Kryminalnaha kodeksa — č. 3 art. 203-1, č. 3 art. 352 i častkova pavodle č. 3 art. 130. Jany zajavili, što ŭ ich nie było mety «raspalvać».
Pa spravie prachodziać piaciora paciarpiełych — supracoŭniki milicyi i suddzia. Adna ź ich — supracoŭnica Partyzanskaha RUUS Minska Lilijana Žylankova, jakaja asabista z maci pryjšła na sud 26 śniežnia.
«Jany vykłali adras majho pražyvańnia i toj, dzie žyvie siamja brata z maleńkimi dziećmi. Potym dapoŭnili danymi baćkoŭ. Telefanavali i pisali im i mnie. Maŭlaŭ, jak mahli vychavać «takoje»? Mama vielmi pieražyvała, płakała kožny dzień. Pisali ž: «Vašu dačka pa kole puścim. Chaj chodzić i azirajecca, da chaty nie dojdzie», «Znojdziecie jaje častkami»… Mama vychodziła sustrakać mianie z pracy. Pryjšłosia taksama pamianiać numar mašyny, stavić jaje daloka ad doma», — pieradavała z suda słovy Žylankovaj sb.by.