Ціханоўская пракаментавала сваю прамову са змененай цытатай Каліноўскага
Падчас мерапрыемстваў, прысвечаных 160-й гадавіне пачатку паўстання 1863—1864 гадоў, Святлана Ціханоўская выступіла з прамовай. Яна згадала Кастуся Каліноўскага, але замяніла слова «маскаль» у вядомай цытаце на «чужую ўладу».
22.01.2023 / 23:41
Фота: Офіс Ціханоўскай
У сацсетках не ацанілі гэту паліткарэктнасць.
Ціханоўская, цытуючы Каліноўскага, замяніла адно слова. Твітар адрэагаваў
Ціханоўская пракаментавала сваю прамову і рэакцыю на яе:
«Сябры, я ведаю, што змененыя словы Каліноўскага ў маім выступе выклікалі абурэнне. У арыгінале цытата гучыць так: «Бо я табе з-пад шыбеніцы кажу, Народзе, што тагды толькі зажывеш шчасліва, калі над табою маскаля ўжэ не будзе». Я прызнаю, што менавіта так павінны цытавацца яго словы.
Гэтае пасланне Каліноўскага актуальнае і сёння: беларусы тады зажывуць шчасліва, калі над імі не будзе чужой акупацыйнай улады. А пад чужой уладай маецца на ўвазе і Лукашэнка, і Расія, якая спрабуе знішчыць нашу дзяржаўнасць.
І я хачу паўтарыць тое, што паўтараю ўжо практычна год: Расія — агрэсар, Лукашэнка і Пуцін — ваенныя злачынцы».