Niderłandy chočuć zakryć najbujniejšaje ŭ Jeŭropie radovišča hazu
Najbujniejšaje ŭ Jeŭropie hazavaje radovišča, zapasy jakoha aceńvajucca ŭ 1 trłn dalaraŭ, pad pahrozaj zakryćcia. Ułady Niderłandaŭ, na čyjoj terytoryi jano znachodzicca, pryniali takoje rašeńnie, bo aktyŭnaja zdabyča hazu pryviała da ziemlatrusaŭ. Pra heta Financial Times paviedamiŭ dziaržsakratar pa zdabyŭnoj pramysłovaści Chans Vijłbryf.
23.01.2023 / 17:27
Fota: nsenergybusiness.com
Hroninhienskaje hazavaje radovišča raźmieščanaje ŭ siejsmaniebiaśpiečnaj zonie ŭ paŭnočna-ŭschodnim rehijonie Niderłandaŭ, niedaloka ad miažy z Hiermanijaj.
Jano z 1963 hoda doŭhi čas było asnoŭnaj krynicaj hazu dla Jeŭropy. Ale ciapier patencyjał radovišča vykarystoŭvajecca tolki častkova. Hadavaja zdabyča skaraciłasia da 2,8 młrd kubamietraŭ — minimumu, nieabchodnaha dla padtrymańnia pracy pompaŭ.
Niahledziačy na cisk na ŭrad, kab pavialičyć zdabyču ŭ 2022 hodzie z-za deficytu hazu ŭ Jeŭropie, kiraŭnictva krainy na heta nie pajšło. Pa słovach Vijłbryfa, jon, naadvarot, chacieŭ by spynić usie raboty na radoviščy da 1 kastryčnika 2023 hoda. Ale kali paśla zimy ŭ Jeŭropie budzie niedachop hazu, radovišča zastaniecca adkrytym da kastryčnika 2024-ha.
Čynoŭnik padkreśliŭ, što zdabyvać hazu bolš dakładna nie buduć ź mierkavańniaŭ biaśpieki. Z 1980-ch u vobłaści radovišča štohod adbyvajecca da 100 ziemlatrusaŭ, vyklikanych śvidravańniem. Bloomberg pisaŭ, što z 327 tysiač damoŭ u rehijonie paciarpieli prynamsi 127 tysiač.