Novym rektaram JeHU znoŭ staŭ nie biełarus
Upieršyniu rektaram VNU stanie palak — vybitny ekanamist Kšyštaf Rybiński, jaki raniej uznačalvaŭ ekanamičny ŭniviersitet u Kazachstanie i byŭ vice-prezidentam Nacbanka Polščy.
03.02.2023 / 11:54
Fota: voxpopuli.kz
3 lutaha na sustrečy z vykładčykami i studentami ŭniviersiteta było abvieščana, što novym kiraŭnikom Jeŭrapiejskaha humanitarnaha ŭniviersiteta (Vilnia) iznoŭ stanie čałaviek nie z Biełarusi: na vakansiju vybrali viadomaha polskaha ekanamista Kšyštafa Rybińskaha.
55-hadovy Kšyštaf Rybiński atrymaŭ stupień doktara ekanamičnych navuk u Varšaŭskaj škole ekanomiki, maje taksama stupień mahistra kampjutarnych navuk. U rozny čas pracavaŭ jak kansultant Suśvietnaha banka, dyrektar prahram Fondu Sorasa ŭ Centralnaj i Uschodniaj Jeŭropie, hałoŭny ekanamist i kiraŭničy dyrektar kamiercyjnych bankaŭ.
Paźniej Rybiński pierajšoŭ na pracu ŭ Nacyjanalny bank Polščy, dzie zaniaŭ pasadu vice-prezidenta, a potym staŭ adnym z partnioraŭ Ernst & Young, dzie kiravaŭ hrupaj ekanamičnaj stratehii.
Palak taksama maje vopyt kiraŭnictva ŭniviersitetami. U pieryjad z 2010 pa 2015 hody jon byŭ rektaram varšaŭskaj Akademii finansaŭ i biznesu «Vistuła», a z 2015 pa 2018-y — rektaram Novaha ekanamičnaha ŭniviersiteta imia T. Ryskułava ŭ Kazachstanie.
Padčas pracy ŭ Kazachstanie Rybiński adznačyŭsia ŭpartaj baraćboj z karupcyjaj u davieranym jamu ŭniviersitecie. Palak zmahaŭsia z pieradačaj vykładčykam hrošaj za pavyšeńnie adznak i mahčymaściu atrymać ekzamienacyjnyja papiery zahadzia, a taksama raspracavaŭ sistemu kalektyŭnaha pakarańnia chabarnikaŭ. Kali vykładčyka łavili na atrymańni hrošaj ad studenta, zvalniali i vyklučali z univiersiteta nie tolki ich, ale i ich naŭprostavaha kiraŭnika. Z momantu ŭviadzieńnia takoha praviła, pavodle Rybińskaha, nie było zafiksavana ni adnaho vypadku chabarnictva va ŭniviersitecie.