Улады Турцыі параўналі сілу землятрусу з выбухам 500 атамных бомбаў
Землятрусы ў Турцыі і Сірыі закранулі шырокія плошчы і забралі жыцці больш за 20 тысяч чалавек.
11.02.2023 / 13:53
Разбураны дом у Адане. Фота: Bernat Armangue / AP
Землятрус на паўднёвым усходзе Турцыі супастаўны з выбухам 500 ядзерных бомбаў, заявіў журналістам кіраўнік Дэпартамента мінімізацыі рызыкі турэцкага Упраўлення надзвычайных сітуацый (AFAD) Архан Татар.
«Працягласць першага землятрусу склала 65 секунд і мела разбуральны эфект. Другі землятрус аказваў разбуральнае ўздзеянне на працягу 45 секунд. Рэгіён моцна трэсла на працягу прыкладна дзвюх хвілін. Энергія, вызваленая ў выніку землятрусу магнітудай 7,7, раўназначная энергіі 500 атамных бомбаў», — сказаў Татар.
Раней турэцкі навуковец-геафізік Ахмет Эрджан у інтэрв'ю газеце Duvar таксама параўноўваў землятрус з выбухам сотняў ядзерных бомбаў. Па яго словах, у радыусе 200 км ад эпіцэнтра ў найбліжэйшыя два-тры гады могуць здарыцца наймагутнейшыя афтаршокі.