Лукашэнка запужвае дэпутатаў: Не будзе мяне, будуць цкаваць вашых дзяцей
Лукашэнка падчас паслання 31 сакавіка зноў пачаў запэўніваць, што нібыта не трымаецца за ўладу. А пасля патлумачыў, чаму не сыдзе.
31.03.2023 / 11:58
Скрыншот відэа БТ
«Не думайце, што я, учапіўшыся кіпцюрамі ў гэтае крэсла, трымаюся за гэтую ўладу. Абсалютна шчыра пра гэта кажу. Вы бачыце, якія абставіны. Многія б хацелі, каб Лукашэнка не было. А раз яны хочуць, каб мяне не было там, значыць трэба рабіць наадварот. Гэта мой прынцып.
Таму я не буду за гэтую пасаду трымацца. Не. Не. І яшчэ раз не. Я думаю пра будучыню. Таму што як ва ўсіх вас у мяне ёсць дзеці, унукі, якія павінны жыць у мірнай і незалежнай краіне.
Я больш за іншых разумею, што калі не будзе Лукашэнкі, то яго дзяцей будуць ціснуць з усіх бакоў. А гэта для мяне непрымальна. Будуць ціснуць і цкаваць вашых дзяцей, асабліва тых, хто стаў у 2020 годзе побач і выстаяў. Будуць здзекавацца з людзей у пагонах. Я думаю пра гэта», — запужваў Лукашэнка.
Скрыншот відэа БТ
Таксама ён заявіў, што ягоны «век заканчваецца» і што перапісваць пад сябе канстытуцыю ён не будзе, але і паміраць не збіраецца.