U Hrodnie pryznačany sud nad vartaŭnikom dziciačaha sadka, uniesienaha ŭ śpis «terarystaŭ»
U Hrodnienskim abłasnym sudzie ŭ paniadziełak pačniecca razhlad kryminalnaj spravy 53-hadovaha vartaŭnika dziciačaha sadka Valancina Dubroŭščyka, jakoha abvinavačvajuć pa niekalki «ekstremisckich» artykułach, paviedamlaje «Viasna».
01.04.2023 / 12:52
Valancin Dubroŭščyk
Sudovy praces pryznačany vieści suddzia Dźmitryj Bubienčyk.
Pra zatrymańnie Dubroŭščyka pravaabaroncam stała viadoma 2 vieraśnia 2022 hoda. Tady paviedamlałasia, što haradzienca abvinavačvajuć u abraźlivych kamientarach u dačynieńni da Łukašenki, Karanika, a taksama rasijskich sałdat, što vajuiuć va Ukrainie.
Valancina Dubroŭščyka abvinavačvajuć u abrazie pradstaŭnika ŭłady (art. 369), raspalvańni inšaj sacyjalnaj varožaści i varažniečy (č. 1 art. 130), abrazie Alaksandra Łukašenki (č. 2 art. 368), u paklopie na jaho (č. 2 art. 367) i arhanizacyi i padrychtoŭcy dziejańniaŭ, jakija hruba parušajuć hramadski paradak, albo aktyŭnym ŭdziele u ich (č. 1 art. 342 Kryminalnaha kodeksa).
Zhodna z materyjałami spravy, abvinavačany sa studzienia 2019 hoda pa maj 2021 hoda sa svajho mabilnaha telefona raźmiaściŭ u Telegram paviedamleńni, u jakich davaŭ vidavočna niehatyŭnuju acenku asoby kiraŭnika dziaržavy, abvinavačvaŭ jaho ŭ ździajśnieńni złačynstvaŭ, a taksama publična abražaŭ staršyniu Centrvybarkama, dla čaho vykarystaŭ niecenzurnuju leksiku.
Akramia taho, praź internet abvinavačany zaklikaŭ da ŭdziełu ŭ hrupavych dziejańniach, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, prymianieńniu hvałtu da supracoŭnikaŭ pravaachoŭnych orhanaŭ, raspalvaŭ sacyjalnuju varožaść i varažnieču.
15 lutaha proźvišča Dubroŭščyka źjaviłasia ŭ śpisie «asob, jakija majuć dačynieńnie da terarystyčnaj dziejnaści», jaki pieryjadyčna abnaŭlaje KDB.
Viarchoŭny Sud ździekliva pierahledzieŭ prysud dvum fihurantam «spravy Aŭtuchoviča»