Украінцы захапілі памежны пункт, падышлі да горада Грайваран у Белгарадскай вобласці
Упершыню баі з выкарыстаннем верталётаў і бранятэхнікі адбываюцца на тэрыторыі Расіі.
22.05.2023 / 17:02
Дымы ад пажараў у памежнай вёсцы. Скрыншот з відэа
Сёння ўранку ўзброеная група пры падтрымцы як мінімум аднаго танка і некалькі адзінак бранятэхнікі зайшла на тэрыторыю Белгарадскай вобласці Расіі. Пасля кароткага бою яны захапілі пагранічны пункт і прайшлі праз некалькі населеных пунктаў у кірунку горада Грайваран.
Горад Грайваран з насельніцтвам 6000 чалавек знаходзіцца за 5 км ад украінскай мяжы на аўтадарозе Ахтырка-Тамароўка-Белгарад. Занятыя ўкраінскімі сіламі сёлы Козінка, Гара-Падол і Глотава ляжаць суцэльнай смугой ад мяжы да Грайварана.
Расійскія СМІ паведамляюць пра артылерыйскі абстрэл Грайварана. У небе над вобласцю назіралі расійскія вайсковыя верталёты. Паведамляецца аб прывядзенні паліцыі вобласці ў стан поўнай гатоўнасці, а таксама аб пошуку дыверсійных груп у розных раёнах вобласці. СМІ паведамляюць пра эвакуацыю насельніцтва Грайварана і прылеглых населеных пунктаў.
Адказнасць за падзеі ўзялі на сябе Легіён «Свабода Расіі» і Рускі добраахвотніцкі корпус. Яны заявілі, што «вызвалілі» населены пункт Козінка Белгарадскай вобласці ў мэтах стварэння на прымежнай расійскай тэрыторыі буфернай зоны, каб абараніць тэрыторыю Украіны ад абстрэлаў. Таксама яны паведамілі пра ўваход «перадавых атрадаў» у горад Грайваран — аднак апошняму няма пацвярджэння ў расійскіх каналах.
Уранку паведамленні ўкраінскіх каналаў і расійскіх добраахвотніцкіх падраздзяленняў аб захопе памежнага пункту ўлады расійскага рэгіёна называлі фэйкамі і інфармацыйнай атакай. Пазней губернатар Белгарадскай вобласці Вячаслаў Гладкоў заявіў, што на тэрыторыю Грайваранскай акругі зайшла дыверсійна-разведвальная група УСУ.
«Узброеныя сілы РФ разам з пагранслужбай, Расгвардыяй і ФСБ прымаюць неабходныя меры па ліквідацыі праціўніка», заявіў Гладкоў.
З’явіліся фота, як сцвярджаецца, з населеных пунктаў Белгарадскай вобласці, куды зайшлі дыверсанты, а таксама шматлікіх аўтобусаў, адпраўленых для эвакуацыі насельніцтва.
У Белгарадскай вобласці аб'яўлены агульны збор супрацоўнікаў ва ўсіх аддзелах унутраных спраў рэгіёна.
Інфармаваны тэлеграм-канал Baza паведаміў пра крушэнне пад Белгарадам расійскага вайсковага верталёта Мі-8.
У ГУР Украіны падзеі ў Белгарадскай вобласці Расіі пракаментавалі так.
Мэтай аперацыі прадстаўнік вайсковай разведкі Андрэй Юсаў назваў «стварэнне паласы бяспекі для абароны мірных украінцаў».
«Падзеі ў Белгарадскай вобласці і іншых прымежных тэрыторыях — следства поўнамаштабнага ўварвання і агрэсіўнай вайны пуцінскай Расіі супраць Украіны. Так, адказнасць за гэтыя падзеі ўзялі на сябе грамадзяне РФ, а менавіта сілы РДК і легіёна «Свабода Расіі». Я думаю, што мы ўсе толькі можам павітаць рашучыя дзеянні апазіцыйна настроеных грамадзянаў Расіі, якія гатовыя да ўзброенай барацьбы са злачынным рэжымам Пуціна», — цытуе прадстаўніка ГУР тэлебачанне «Громадське».