Kryčaŭskija krajaznaŭcy spačatku znajšli redkaje fota časoŭ Druhoj suśvietnaj, a paśla i redki pradmiet, adlustravany na im
Usio pačałosia z taho, što kryčaŭskija amatary historyi znajšli niamiecki zdymak časoŭ akupacyi Kryčava vojskami Treciaha rejcha. Hety zdymak zachavaŭsia ŭ pryvatnaj kalekcyi. Na fota bačna, jak niamieckija vajskoŭcy razhružajuć bočki z palivam u rajonie čyhunačnaha vakzała Kryčava. A samaje cikavaje, što častka adnoj z hetych bočak zachavałasia ŭ horadzie dahetul, piša «Mahiloŭ.Media».
22.07.2023 / 23:18
Reštki toj niamieckaj bočki, u jakoj zachoŭvałasia i pieravoziłasia paliva, znajšli na adnym z padvorkaŭ u staroj častcy Kryčava. Bočka hetaja abrezanaja, a nižniaja jaje častka dahetul vykarystoŭvajecca ŭ jakaści jomistaści dla vady.
Na dnie bočki možna ŭbačyć vycisnutyja słovy.
Sulo 1941
KRAFTSTOFF
200L
FEUERGEFÄHRLICH
HFFR
Kraftstoff 200 L feuergefählich pierakładajecca jak «paliva 200 litraŭ vohnieniebiaśpiečna», samaja ž nižniaja abrevijatura HFFR — Halogen Free Fire Retardant (biezhałahienny vohnieachoŭny sastaŭ). Tak tłumačać na instahram-staroncy «Nieviadomy Kryčaŭ».
Što da nadpisu Sulo, jaki taksama vycisnuty na dnie bočki, to heta suśvietna viadomaja niamieckaja kampanija, jakaja zajmajecca vypuskam bakaŭ dla śmiećcia. Hetaja kampanija była zasnavanaja jašče ŭ 1890 hodzie i pačynała z vytvorčaści mietaličnych bakaŭ dla śmiećcia.
Jak miarkujuć aŭtary «Nieviadomaha Kryčava», padčas Druhoj suśvietnaj vajny dziejnaść hetaha pradpryjemstva, jak i mnohich u toj čas, była, vierahodna, pieraviedzienaja na vajennyja rejki, tamu ŭ hety čas kampanija stała vypuskać mietaličnyja bočki dla paliva na patreby viermachta. Hetyja bočki, naturalna, traplali i na terytoryju Biełarusi.
Čytajcie taksama:
Na haradziščy ŭ Kryčavie razvalvajecca abarončaje ŭmacavańnie XVI—XVII stahoddziaŭ
Na raskopkach pad Minskam znajšli jašče adzin tryzub kniazia Iziasłava
Nieŭzabavie apublikujuć 30 unikalnych fota Janki Kupały, siarod jakich zdymak z maci