Гомельскаму бармену Вятошкіну замянілі «хатнюю хімію» на рэальны тэрмін
У траўні гэтага года Гомельскі абласны суд прысудзіў да пяці гадоў «хатняй хіміі» 30-гадовага бармена гомельскага бара «Кватэрнік» Глеба Вятошкіна, аднак прысуд так у сілу і не ўступіў. Гэты прысуд Глебу замянілі на больш суровы, піша выданне «Люстэрка».
12.08.2023 / 18:32
Глеб Вятошкін
Як расказалі крыніцы «Люстэрка», 8 чэрвеня пракуратура падала апеляцыйны пратэст на пастанову суда. У выніку перагляду справы гамяльчук быў асуджаны на 1,5 года калоніі агульнага рэжыму.
Пра затрыманне Глеба Вятошкіна праваабаронцы даведаліся 28 лістапада 2022 года з праўладных тэлеграм-каналаў. Паведамлялася, што ён нібыта распаўсюджваў «экстрэмісцкія матэрыялы», а ў жніўні 2020 года браў удзел у пратэстах, абражаў прадстаўнікоў улады і распальваў сацыяльную варожасць.
Увесь час да суда мужчына знаходзіўся ў СІЗА-3 у Гомелі. Таксама пасля затрымання ў дачыненні да Глеба быў складзены пратакол паводле ч. 2 арт. 19.11 КаАП — «распаўсюд экстрэмісцкіх матэрыялаў».
30 траўня гэтага года ў Гомельскім абласным судзе суддзя Аляксандр Піскуноў абвясціў прысуд: абмежаванне волі без накіравання ў папраўчую ўстанову адкрытага тыпу тэрмінам на пяць гадоў. Глеб быў вызвалены з-пад варты ў зале суда.
Пазней, аднак, пракуратура падала апеляцыйны пратэст на пастанову суда і, паводле звестак крыніц «Люстэрка», першапачаткова прасіла прысудзіць гамяльчаніна да трох гадоў пазбаўлення волі.
Справа разглядалася ў Вярхоўным судзе 8 жніўня. Прадстаўнік пракуратуры запытаў 1,5 года пазбаўлення волі з адбываннем у калоніі агульнага рэжыму. Судовая калегія падтрымала запыт пракурора.
Прысуд уступіў у законную сілу з унесенымі судом зменамі. На наступным тыдні Глеб адправіцца адбываць пакаранне.
Чытайце таксама:
Суддзя Талачынскага райсуда пайшла на павышэнне. Раней яна судзіла за палітыку