«Čekist», vieteran ci špijon HUR? Mahčyma, u Polščy vykryli jašče adnaho ahienta biełaruskaha KDB
Na «Radyjo Racyja» ŭčora była apublikavanaja razmova ź Viačasłavam Hałahuckim. Mužčynu pradstavili jak «pradprymalnika, kandydata navuk, vykładčyka techničnaha ŭniviersiteta», asudžanaha dvojčy za aktyŭnuju hramadzianskuju pazicyju, paciarpiełaha ad represij, jaki zmoh pakinuć Biełaruś. Ale «Novy Čas» znajšoŭ inšyja źviestki pra hetaha čałavieka. Na hety momant artykuł z sajta «Racyi» vydaleny, adnak vydańnie ličyć nieabchodnym raskazać čytačam, chto taki nasamreč Viačasłaŭ Hałahucki i čamu nie varta jamu daviarać.
04.04.2024 / 19:32
Viačasłaŭ Hałahucki. Fota z sajta Radyjo Racyja
«Novy čas» raspytaŭ Karynu (imia źmieniena), arendadaŭcu žytła ŭ Varšavie, dzie žyŭ Viačasłaŭ, i jahonaha znajomaha Kiryła (imia źmieniena), jaki mieŭ ź im kantakt niekalki apošnich tydniaŭ.
Voś što raskazała Karyna:
«Adzin z našych žylcoŭ skazaŭ, što ŭ jaho jość siabar, i zapytaŭ, ci možna, kab hety siabar pryjechaŭ i taksama žyŭ u nas. My zhadzilisia.
Viačasłaŭ Hałahucki pryjechaŭ, zasialiŭsia, i my daviedalisia, što jon chodzić z mylicaj i kulhaje na adnu nahu. My ŭ jaho zapytali, što z nahoj. Jon skazaŭ, što vajavaŭ u Pałku Kalinoŭskaha, padarvaŭsia na minie «pialostak». I dadaŭ, što ŭ jaho amputavanaja pałova stupni — zastalisia piatka i paru palcaŭ.
Z dakumientaŭ u jaho było časovaje paśviedčańnie — jon padavaŭsia na mižnarodnuju abaronu, kazaŭ, što ŭ jaho było niekalki administratyvak u Biełarusi. Jašče jon pakazvaŭ šalik i šaŭron, kazaŭ, što słužyŭ u bataljonie «Teror» i mieŭ pazyŭny «Źmiej». My vielmi praniklisia hetaj historyjaj, pryniali jaho, pasialili na pieršym paviersie.
Ja pazvaniła svajmu znajomamu z Fondu vieteranaŭ, jaki słužyŭ u Pałku Kalinoŭskaha, a ciapier zasnavaŭ fond dla dapamohi. Ja raspaviała pra Viačasłava, kab jamu akazali padtrymku pa mahčymaści.
Moj znajomy pryjechaŭ, ahledzieŭ nahu Viačasłava i prasiŭ pakazać dakumienty ab ranieńni. U Viačasłava nie było takich papier. Moj znajomy jaho sfatahrafavaŭ, paśla zdymki razasłali ŭ Połk Kalinoŭskaha, tam jaho nichto nie moh apaznać.
Jon šmat piŭ, i ja jaho papiaredziła, što kali jon praciahnie tak vypivać, to nam pryjdziecca raźvitacca.
I raptoŭna mnie pazvaniŭ čałaviek, jaki pradstaviŭsia plamieńnikam Viačasłava. Jon skazaŭ, što ŭsie svajaki Hałahuckaha chočuć, kab jon viarnuŭsia ŭ Minsk, ale jon źbieh. Čamu tak zdaryłasia, jon nie patłumačyŭ.
Ja, kaniešnie, zapytała, čamu jaho kinuli, kali jon vajavaŭ, dzie jaho siabry, znajomyja jakija-niebudź. I plamieńnik mnie adkazaŭ: «Słava nidzie nie vajavaŭ, heta dakładna, a što ź jaho nahoj, buduć vyśviatlać daktary, jon kładziecca ŭ balnicu».
Jašče plamieńnik skazaŭ, što ŭ Biełarusi Hałahucki pracavaŭ na vysokaj pasadzie ŭ niejkaj pryvatnaj firmie i što ŭ jaho bahataja siamja.
Nieŭzabavie paśla hetaha telefanavańnia Viačasłaŭ źjechaŭ i loh u balnicu».
Paralelna z padziejami, pra jakija raskazvaje Karyna, Viačasłaŭ kamunikavaŭ z adnym žylcom — Kiryłam (imia źmieniena), jaki, čym bolš ź im razmaŭlaŭ, tym bolš staŭ padazravać u Hałahuckim špijona. Voś čym padzialiŭsia z «Novym časam» Kirył:
«Ja zadavaŭ jamu pytańni pra jaho žyćcio, jaho ŭdzieł u pratestach u Biełarusi, a jon časta nie moh adkazać, ci jahonyja adkazy byli błytanyja, było šmat niesupadzieńniaŭ.
Adzin raz u mianie była mahčymaść pahladzieć jaho telefon, i ja znajšoŭ pierapisku z čałaviekam, chutčej za ŭsio, ahientam KDB. Tam byli prapisanyja zadańni. Maŭlaŭ, tabie treba ŭkaranicca ŭ dyjasparu, ciśni na škadobu, prasi padtrymki ŭ fondach, źbiraj hranty. A jašče jamu treba było daviedacca, jak finansujecca RDK (Rasijski dobraachvotnicki korpus), adkul tam padtrymka.
U pierapiscy ja pračytaŭ pra niepakoj Viačasłava nakont jaho «lehiendy», na što byŭ adkaz: «Nie chvalujsia, my ciabie abvieścim u mižnarodny vyšuk, i ŭsio budzie ok». Jašče tam byli parady vydalać usiu pierapisku, abmiarkoŭvałasia evakuacyja z Polščy.
Ja znajšoŭ u telefonie Hałahuckaha fota prysudu ad 2023 hoda — tam było napisana, što jon namieśnik dyrektara pryvatnaj firmy, na žal, ja nie zapomniŭ nazvu. Pavodle dakumienta, jon u stanie ałkaholnaha apjanieńnia nakinuŭsia na aŭtamabil z rasijskimi numarami i paškodziŭ jaho. Nijakich dakumientaŭ, fota, źviazanych z pratestami, ja ŭ jaho telefonie nie znajšoŭ.
Mahčyma, što kali jaho złavili i sudzili za hety ŭčynak, jaho i zavierbavali. Ja raskazaŭ usio heta Karynie, kab jana viedała, što heta za čałaviek».
Karyna dadaje, što Viačasłaŭ zvaniŭ joj pierad vypiskaj z balnicy. Jana paprasiła jaho zabrać rečy i źjechać, tamu što adkrylisia voś takija niepryjemnyja fakty — što jon pracuje na biełaruski KDB.
«U adkaz Hałahucki staŭ kryčać u trubku, što my ŭsie nienarmalnyja i nas treba zdać u psichušku, — kaža Karyna. — Ja jaho zapytvała: dyk čamu vy chłusili, što vajavali? Vas nichto nie apaznaŭ, vas nichto nie viedaje. Paźniej moj znajomy z fondu pakazaŭ fota nahi Viačasłava miedykam — jany skazali, što heta nastupstvy zapuščanaha dyjabietu.
Hałahucki pačaŭ mnie kazać, što jon tajny ahient HUR. U vyniku my raźvitalisia, i bolš jon mnie nie zvaniŭ».
«Novy Čas» pasprabavaŭ pravieryć źviestki pra toje, što Viačasłaŭ Hałahucki źjaŭlajecca vykładčykam i kandydatam navuk. «Prahuhliŭšy» jaho imia i proźvišča, žurnalisty nie zmahli znajści nijakich materyjałaŭ, spasyłak na artykuły, infarmacyi pra ŭdzieł u navukovych kanfierencyjach — zvyčajny «elektronny śled» u siecivie luboha vykładčyka, navat represavanaha.
Čytajcie taksama: