Правансальскае віно па галівудзкіх рэцэптах
Кіно ў Менску
Фінансавы махляр Макс Скінэр атрымлівае ў спадчыну ад памерлага дзядзькі вінаграднік у Правансе. Скінэр зьбіраецца прадаць сядзібу, але яго не адпускаюць дзіцячыя ўспаміны. А рамантычнае каханьне да мясцовае прыгажуні ўзмацняе ваганьні.
05.12.2006 / 17:01
Фінансавы махляр Макс Скінэр (Расэл Кроў) атрымлівае ў спадчыну ад памерлага дзядзькі вінаграднік у Правансе. Дзелавы Скінэр зьбіраецца прадаць сядзібу, але яго не адпускаюць дзіцячыя ўспаміны. А рамантычнае каханьне да мясцовае прыгажуні і новазнойдзеная сваячка ўзмацняюць ваганьні.
Тактоўная, далікатная й рамантычная стужка Рыдлі Скота. «Ня ў грошах шчасьце!» – хаця яны таксама будуць. Герой стаіць перад выбарам: адмовіцца ад сваіх успамінаў, чалавечнасьці, ціхіх сямейных радасьцяў – ці паслаць к чорту апрыклую фінансавую калатнечу. Няцяжка здагадацца, якім будзе фінал, але зьдзіўляе, наколькі пасьлядоўна амэрыканскі фільм дыскрэдытуе сквапнае грошалюбства.
Такія стужкі называюць «жаночымі». Але, у адрозьненьне ад іншых жаночых фільмаў, сьлёзы, сьмех, жарты й драматычныя ўскладненьні падабраныя тут у неабходнай прапорцыі. Ляніва-густоўны Расэл Кроў – фінансавы мярзотнік, жартаўнік, закаханы; мудры дзядзька Альбэрт Фіні, правансальская дзяўчына з характарам, і прыгажуня сястра.
Рамантычнае спатканьне ў адкрытым кінатэатры, дзе дэманструюцца мэлядрамы, і дождж, як выпрабаваньне для закаханых; пацешны дзядок з правансальскім дыялектам і біржавыя інтрыгі.
Праблемы вырашаюцца амаль бесканфліктна, на стале чырвонае віно рэдкага правансальскага гатунку… І ці настолькі важна, што правансальскае віно згатаваў амэрыканец па галівудзкіх рэцэптах?