Viciebskija «kanhresmieny» napieradzie Biełarusi ŭsioj
Z pošty Redakcyi.
24.05.2007 / 15:06
Na vychodnych — Kanhres demakratyčnych siłaŭ. Imknieńnie lideraŭ asobnych palityčnych partyjaŭ jak maha chutčej pravieści Kanhres, jaki by źmianiŭ kanfihuracyju ŭ kiraŭnictvie apazicyi i ŭpartaja hadavaja baraćba za hetuju «hałoŭnuju zadaču» amal ździejśniajecca. Z pošty Redakcyi.
«Nam nie patrebny lider» — hod śćviardžali kiraŭniki partyj. I pakłali hod baraćby, kab dabicca hałoŭnaha — admovicca ad lidera apazicyi. Pry hetym jany nie chacieli brać pad uvahu mierkavańnie demakratyčnaj častki nasielnictva, ni mierkavańnie siabraŭ svaich partyjaŭ.
Dziela taho, kab dakazać racyju svajoj «hałoŭnaj stratehičnaj zadačy» u baraćbie z dyktaturaj — admovicca ad lidera apazicyi, jany vyrašyli spytać aktyvistaŭ. Była vydumanaja byccam by biassprečnaja schiema. Chto sabraŭ 300 podpisaŭ padčas kampanii «Miascovyja vybary», toj maje prava prymać rašeńni na Kanhresie. Zaadno heta schiema i pakaža ŭ jakoj partyi kolki aktyvu. I ŭ asnoŭnym tak i adbyłosia.
Pa Viciebskaj vobłaści AHP praviała na Kanhres 5 čałaviek, BNF — 5, BSDP (H) — 8, BSDP (NH) — 11, Ruch «Za Svabodu» — 19. Zdavałasia by heta adpaviadaje realnaj rastanoŭcy sił na Viciebščynie. Ale tut my upuskajem adzin momant. U apazicyi isnuje takaja kamunistyčnaja partyja, i hetyja chłopcy majuć dośvied pracy z hałasavańniem, jakija sychodzić u hłybiniu dziesiacihodździaŭ.
Admoviŭšysia ad udziełu ŭ miascovych vybarach, «kab nie padstaŭlać» svaich siabraŭ, jakija ŭ balšyni svajoj pracujuć u biudžetnych arhanizacyjach, kamunisty pavinny byli zabiaśpiečyć sabie balšyniu na Kanhresie. I pajšła pisać hubiernija... Ad Viciebskaj vobłaści zahadana było vyłučyć kamunistam 40 delehataŭ.
Hubiernija pisała pra ŭsio. I pra vyłučeńnie ŭ kandydaty, jakija byccam by paśla admovilisia rehistravacca, i składali śpisy vyłučeńniaŭ u kamisii, jakija nie danieśli ŭ administracyi, znoŭku ž «kab nie padstaŭlacca», navat byli hrupy studentaŭ, jakija źbirali podpisy pad manifiestam «Za Svabodu» dla svaich vykładčykaŭ, jakija taksama «nie pavinny padstaŭlacca». Praŭda studenty inšym razam zapaŭniali niekalki radkoŭ adnym podčarkam, da i podpisy adnoj rukoj stavili, ale heta pavinna było «praskočyć», uličvajučy što staršynia Abłasnoj Naziralnaj Kamisii — kamunist, Aršanskaj — kamunist, Połackaj — kamunist.
U Voršy ŭvohule vyrašyli, kab nie mučacca i «nie padstaŭlacca» nie źbirać podpisy, a damovicca. Skłali śpis z «30 hodnych ludziej» padpisali pratakoł — i ŭ Minsk. U Połacku staršynia haradskoj «samaj arhanizavanaj apazicyjnaj partyi» PKB z padroblenym podpisam sakratara nakiroŭvaje pratakoły ŭ Centralnuju Naziralnuju Kamisiju.
Ź Viciebska idzie šeść pratakołaŭ biez podpisaŭ siabraŭ naziralnaj kamisii ad BSDP (NH), BNF i Ruchu «Za Svabodu». Paśla taho jak na Palitradzie było ŭźniataje pytańnie pra sfalsifikavanyja padpisnyja listy i źjaviłasia patrabavańnie adpravić podpisy ŭ abłasnuju kamisiju dla pravierki. Abłasnaja kamisija, u jakoj apynułasia bolšaść pradstaŭnikoŭ «levaha błoku» i ich sajuźnikaŭ, samaraspuściłasia.
Zdavałasia — heta moža być raźviazkaj pra falsifikacyi. CNK usio daskanała pravieryć i falsifikatary «nie projduć». Ale ŭ CNK, dzie balšyniu mieli taksama «levyja» z sajuźnikami vyrašyli pa-inšamu. Raz prychilniki A.Milinkieviča abvieścili pra svoj nieŭdzieł u sfalsifikavanym Kanhresie, patrebna dać šlach usim, chto choča pajści Kanhres niezaležna ad «čyścini» podpisaŭ.
Tamu nieabchodna było — usich zaćvierdzić za vyklučeńniem samych aburalnych vypadkaŭ padrobki. Takim čynam, usie połackija i aršanskija patrapili ŭ delehaty Kanhresa. Usie viciebskija, jakija imknucca na Kanhres, za vyklučeńniem «aburalnych faktaŭ» traplajuć u delehaty.
Viciebščyna napieradzie ŭsioj Biełarusi. 88 delehataŭ vyłučany padčas kampanii «miascovyja vybary». Ale tut i znoŭ i niezadača. Kamunisty, jakija byccam by sabrali bolš za 300 podpisaŭ u pieryjad vybaraŭ i pad manifiestam «Za Svabodu» nie zachacieli jechać u Viciebsk na abłasnuju kanfierencyju, kab «nie padstaŭlacca». Tamu, što, jak aficyjna paviedamili «nie chočuć adryvacca ad hradak». U takoj situacyi prychilnikaŭ abrańnia adnaho Lidara abjadnanych demakratyčnych siłaŭ na abłasnoj kanfierencyi mahło być bolš. Tady vyrašyli pravodzić schod «nie adychodziačy ad hradak» u Voršy, Połacku i Viciebsku.
Jak i čakałasia prychilnikaŭ abrańnia adnaho Lidara abjadnanych demakratyčnych siłaŭ na Viciebskaj abłasnoj kanfierencyi apynułasia bolšaść — 43 suprać 31. Ale kali pryjšli pratakoły z Voršy i Połacku, situacyja źmianiłasia. Za sustaršynstva apynułasia ŭ ahulnaj sumie na 15 hałasoŭ bolš.
I z takoj aryfmietykaj Kanhres budzie vyrašać samaje «losavyznačalnaje» pytańnie apazicyi?