Ajcu Šramku — 50 hadoŭ

Adłučany ad słužeńnia kliryk Śviata‑Pakroŭskaha prychodu stalicy a. Alaksandar Šramko śviatkuje jubilej.

04.07.2007 / 15:48

Siońnia paŭviekavy jubilej adznačaje pravasłaŭny śviatar, kliryk Śviata‑pakroŭskaha prychodu ŭ mienskaj Viaśniancy a. Alaksandar Šramko.

Nahadajem, što ŭ traŭni 2007 h. mitrapalit Fiłaret zabaraniŭ a. Alaksandru pravodzić słužby dy zaličyŭ jaho pa‑za štat. U vinu śviataru pastavili ŭdzieł u kanferencyi, pryśviečanaj zakonu ab svabodzie sumleńnia. Alaksandar Šramko tady rezka krytykavaŭ hety zakon, i jahonaja pazycyja razyšłasia z aficyjnaj pazycyjaj Biełaruskaj pravasłaŭnaj carkvy.

Niedzie praz tydzień paśla hetych padziejaŭ Alaksandar Šramko napisaŭ pakajanny list uładyku Fiłaretu, ale adkazu da hetaje pary niama.

Redakcyja «Našaj Nivy» dałučajecca da vinšavańniaŭ ajcu Alaksandru i zyčyć jamu žyćciovaj vytryvałaści.

***

Ajciec Alaksandar Šramko naradziŭsia ŭ 1957 h. u Pinsku. U 1974—1980 hh. vučyŭsia na fakultecie radyjofizyki BDU. U kancy 1970‑ch pryjšoŭ da Boha, spačatku naviedvaŭ carkvu Evanhielskich chryścijanaŭ‑baptystaŭ «Hałhofa», potym sabor Śviatoha Ducha. Z kanca 1980‑ch — brat miłasernaści ŭ siastrynstvie Safii Słuckaj pry katedralnym sabory, a potym dyrektar adnoj ź pieršych niadzielnych škołak u Miensku. Pracavaŭ nastaŭnikam fizyki. U 1997 h. skončyŭ Mienskuju duchoŭnuju seminaryju.

Śviatarskaje paśviačeńnie atrymaŭ u 1994 h., byŭ nastajacielem chrama ŭ v.Stročycy. Pieršy ź mienskich śviataroŭ pačaŭ na słužbach čytać Evanhielle pa‑biełarusku.

U 1995 h. — nastajaciel chrama ŭ h.p. Družny. 1996 h. — kliryk Śviata‑Pakroŭskaha prychodu (m‑n Viaśnianka). 1997—2003 hh. — vykładčyk Śviatoha Piśma ŭ Mienskaj duchoŭnaj vučelni. Z 1999 h. staŭ aktyŭnym karystalnikam Internetu i stvaraje sajt «Dziońnik śviatara».

***

U krasaviku na sajcie «NN» prajšła onłajn‑kanferencyja z ajcom Šramkom.

Źmicier Pankaviec