Мясніковіч: Урад бярэ пад асаблівы кантроль расходаванне сродкаў на мадэрнізацыю прадпрыемстваў 2

Эфектыўнасць расходавання сродкаў на праекты мадэрнізацыі прадпрыемстваў будзе на асаблівым кантролі ўрада, заявіў прэм’ер-міністр Беларусі Міхаіл Мясніковіч, заслухоўваючы справаздачы некаторых міністэрстваў, у тым ліку Мінэканомікі, аб гатоўнасці да выканання задач 2013 года, паведамляе прэс-служба ўрада.

Як паведаміў міністр эканомікі Мікалай Снапкоў, органы дзяржкіравання сёлета павінны сканцэнтраваць сваю дзейнасць на некалькіх асноўных кірунках: мадэрнізацыі дзейных прадпрыемстваў, здольных забяспечыць устаноўлены ўзровень прадукцыйнасці працы; стварэнні новых прадпрыемстваў, а таксама інавацыйных праектах. Паводле яго слоў, мадэрнізацыя будзе праводзіцца на аснове канкрэтных праектаў і іх эфектыўнасці.

Мясніковіч даручыў Снапкову дакладна вызначыць крыніцы фінансавання гэтых праектаў: уласныя сродкі прадпрыемстваў, бюджэтныя сродкі, крэдытныя рэсурсы.

Таксама міністр паведаміў, што плануюцца меры па далейшым фарміраванні камфортнага бізнес-асяроддзя ў частцы развіцця недзяржаўнага сектара эканомікі, а таксама паляпшэнні інвестыцыйнага клімату.

У якасці двух асноўных рэзерваў для росту ВУП краіны міністр назваў экспарт і інавацыі.

Галоўныя паказчыкі для прадпрыемстваў — гэта прыбытак і заработная плата, для аблвыканкамаў — валавы рэгіянальны прадукт і заработная плата, для рэспубліканскіх органаў дзяржкіравання — рост прамвытворчасці і рэнтабельнасць продажу.

Для развіцця прадпрыемстваў — традыцыйных і новых — усе інстытуцыянальныя ўмовы створаны, аднак адчуваецца недахоп рэальных праектаў, канстатаваў міністр. Мінэканомікі сумесна з аблвыканкамамі правядзе дапрацоўку праектаў развіцця новых прадпрыемстваў па раёнах, а таксама канкрэтызуе пералік інавацыйных праектаў для фінансавання іх за кошт інавацыйных фондаў абласцей.

Развіццё атрымаюць інфармацыйна-камунікацыйныя тэхналогіі.

Для гэтага міністэрства сумесна з экспертамі Міжнароднай фінансавай карпарацыі распрацуе меры і дарожную карту па інтэнсіўным развіцці гэтага сектара. Міністр працы і сацыяльнай абароны Марыяна Шчоткіна ў ходзе справаздачы заявіла, што адной з асноўных задач, якія стаяць перад міністэрствам у 2013 годзе, з’яўляецца эфектыўнае выкарыстанне працоўных рэсурсаў, павышэнне выніковасці занятасці насельніцтва.

Прэм’ер-міністр прывёў прыклады нерацыянальнага выкарыстання працоўных месцаў, залішняй колькасці работнікаў на прадпрыемствах і ў арганізацыях, паведамляе прэс-служба.

Андрэй Серада, БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ