Аўстрыйская фірма «АТЕС Holding Gmbh» у 2007‑2011 гадах набудзе акцыі ААТ «Мотавела» на 15,6 млрд. рублёў. Адпаведнае рашэнне ўтрымліваецца ва ўказе прэзідэнта № 354 ад 26 ліпеня 2007 года, апублікаваным на Нацыянальным прававым інтэрнет‑партале.
Як паведамілі ў назіральным савеце акцыянернага таварыства, ва ўласнасць аўстрыйскай фірмы пяройдуць усе акцыі, што належаць дзяржаве, — 99,7%; 0,3% акцый належыць фізічным асобам. Аплата акцый будзе ажыццяўляцца з 1 студзеня 2008 года роўнымі долямі штогод па 3,1 млрд. рублёў.
Згодна з указам, фірма таксама аплаціць даўгі прадпрыемства перад бюджэтам краіны і Мінска і інвестуе ў яго ў 2008‑2012 гадах не менш чым 20 млн. долараў. Пры гэтым фірма «ATEC» абавязана будзе захаваць спецыялізацыю ААТ «Мотавела» і яго гандлёвую марку.
У выпадку невыканання ўзятых на сябе абавязацельстваў фірма «АТЕС» будзе абавязана пералічыць у рэспубліканскі бюджэт сумы, якія складаюць рознасць паміж рыначным коштам акцый на момант набыцця і іх намінальным коштам.
Мінскі мотавелазавод быў пераўтвораны ў адкрытае акцыянернае таварыства ў 1999 годзе. 100 працэнтаў яго акцый належала працоўнаму калектыву. ААТ «Мотавела» выпускае розныя мадэлі веласіпедаў, у тым ліку дзіцячых, а таксама матацыклы, грузавыя мотакаляскі, велапрычэпы, велатрэнажоры, інвалідныя каляскі, запасныя часткі да матацыклаў і веласіпедаў. На момант акцыявання асноўная прадукцыя прадпрыемства паспяхова рэалізоўвалася на рынках Расіі і шэрагу краін Азіі. Але ў апошнія гады «Мотавела» фактычна было выціснута з азіяцкіх рынкаў кітайскімі канкурэнтамі. У 2006 годзе згодна з рашэннем прэзідэнта была праведзена рэструктурызацыя запазычанасці прадпрыемства перад рэспубліканскім і мясцовым бюджэтамі і выдзелены субсідыі Мінгарвыканкама на 17,3 млрд. рублёў для мадэрнізацыі. Умовай рэструктурызацыі было аднаўленне дзяржуласнасці, якая цяпер складае 99,7%.
Фірме «АТЕС» належыць беларуска‑аўстрыйскае сумеснае ЗАТ «Шклозавод «Ялізава» — найбуйнейшае ў Беларусі прадпрыемства шкляной галіны, якое дынамічна развіваецца. У красавіку 2007 года «АТЕС» заявіла пра свой намер інвеставаць сродкі ў будаўніцтва завода па вытворчасці кальцынаванай соды пад Мазыром (Гомельская вобласць).
