Больш важыш — больш плаці? Што вы думаеце пра такую інавацыю? 10

Традыцыйна за білеты мы плацім за месца, незалежна да таго, колькі важыць чалавек. Авіякампанія ціхаакіянскай дзяржавы Самоа вырашыла ўвесці іншы прынцып: pay-as-you-weigh — плаці па вазе.

Авіякампанія абгрунтоўвае сваё рашэнне тым, што пры новай сістэме падліку многія пасажыры выйграюць у цане.

«Авіяцыйная галіна сыходзіла з таго, што людзі ва ўсім свеце важаць аднолькава», — тлумачыць мэнэджар Samoa Air Крыс Лангтан. — Між тым самалёты ж могуць несці толькі вызначаную нагрузку, незалежна ад колькасці месцаў».

Тое, што такое пытанне паўстала ўпершыню на астраўной дзяржаве, невыпадкова. Генетычна жыхары Палінэзіі вельмі схільныя да атлусцення. Жыхары Самоа — іх 170 тысяч — займаюць 4-е месца ў свеце па долі атлусцелых у насельніцтве. Іх на Самоа 60%. З распаўсюдам цукру на астравах распаўсюдзілася цукроўка, на якую хварэе вялікая доля насельніцтва.

На Самоа два галоўных вострава. Расцэнкі на палёты ўнутры краіны складаюць $0,57 за кілаграм пасажыравагі. Адзіны міжнародны палёт кампанія выконвае на суседнюю тэрыторыю, у Амерыканскае Самоа. За гэтае падарожжа на адлегласць 402 км трэба заплаціць $1,03 за кілаграм пасажыравагі.

З нашых краёў на тым Самоа і ці бываў хто, але ж цікава як прэцэдэнт. Што вы думаеце пра такую інавацыю?

Сяргей Гезгала

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ