Прадстаўнікі палітычных партый, арганізацый, няўрадавых арганізацый і рухаў, якія сабраліся 19 красавіка ў офісе Партыі БНФ для абмеркавання найбольш вострых для Беларусі экалагічных праблем, аб’явілі аб стварэнні Беларускага экалагічнага камітэта. Сустрэча прайшла ў рамках першага круглага стала «Чарнобыль. Астравец. Эвалюцыя катастрофы», арганізаванага аргкамітэтам «Чарнобыльскага шляху — 2013».
Палітыкі і грамадскія дзеячы абмеркавалі разам з эколагамі і экспертамі экалагічныя праграмы і пазіцыю сваіх партый. Найбольш вострым для Беларусі, на думку прысутных, з’яўляецца пытанне змякчэння наступстваў аварыі на ЧАЭС і будаўніцтва Астравецкай АЭС, якое ажыццяўляецца з парушэннямі заканадаўства, будаўнічых норм і без праектнай дакументацыі. Прадстаўнікі дэмсіл і эколагі згадалі таксама пра размяшчэнне ў краіне экалагічна небяспечных вытворчасцяў, знішчэнне зялёных зон, распрацоўку тарфянікаў на асабліва ахоўваемых тэрыторыях і многія іншыя. Асобна ўдзельнікі адзначылі паўсямеснае парушэнне заканадаўства і змякчэнне экалагічных законаў.
Беларускі экалагічны камітэт задуманы не як арганізацыя, а як адкрытая пляцоўка, якая дзейнічае пастаянна,дзе прадстаўнікі палітычных партый, грамадскіх арганізацый, мясцовых ініцыятыў, эколагі і эксперты змогуць абмяркоўваць наспелыя экалагічныя праблемы і знаходзіць шляхі іх вырашэння.
«Наша задача — экалагічнае адраджэнне Беларусі, і гэта павінна стаць нацыянальнай ідэяй беларусаў», — заявіў прадстаўнік «Еўрапейскай Беларусі», адзін з ініцыятараў стварэння экалагічнага камітэта Віктар Івашкевіч.
На думку сустаршыні аргкамітэта па стварэнні партыі «Беларуская хрысціянская дэмакратыя» Віталя Рымашэўскага, у экалагічнага камітэта павінна быць стратэгія, праграма дзеянняў для змянення экалагічнай сітуацыі ў бліжэйшай і доўгатэрміновай перспектыве.
«Экалагічны камітэт дазволіць дзейнічаць разам, і гэта павялічыць нашы шанцы дабіцца вырашэння тых ці іншых вострых пытанняў. Апрача таго, пляцоўка дасць магчымасць атрымліваць усім яе ўдзельнікам своечасовую інфармацыю аб экалагічных праблемах і спосабах іх вырашэння», — мяркуе грамадскі эколаг, каардынатар Беларускай антыядзернай кампаніі Таццяна Новікава.
У камітэт увайшлі прадстаўнікі «Еўрапейскай Беларусі», «Беларускага руху», Беларускай антыядзернай кампаніі, Беларускай партыі левых «Справядлівы свет», БСДП «Грамада», кампаній «Гавары праўду!», «За справядлівыя выбары!», АГП і Партыі БНФ. Ініцыятары чакаюць, што з працы камітэта возьмуць удзел рэгіянальныя эколагі.
