У першы раз актывістам забаранілі праводзіць фэст з-за таго, што 2 чэрвеня святочнае мерапрыемства запланаваў аддзел культуры. Калі яны папрасілі перанесці фэст на тыдзень наперад, ім адмовілі ў другі раз, ужо не ўдакладняючы прычынаў.
Заяўку на правядзенне 2 чэрвеня культурна-адукацыйнага мерапрыемства "Мілавідскі фэст — Памяці касіянераў 1863" баранавіцкія актывісты Віктар Сырыца, Вячаслаў Болбат і Тэрэса Селівончык ў першы раз накіравалі ў райвыканкам у сярэдзіне красавіка, паведамляе «Intex-press».
У праграме мерапрыемства яны запланавалі ўскладанне кветак на мілавідскіх могілках, выступ гісторыкаў, паэтаў і бардаў, гістарычную віктарыну, а таксама ўборку смецця на тэрыторыі могілак.
Усе неабходныя дамовы па абслугоўванню мерапрыемства — з раённым ЖКГ, міліцыяй і палікліннікай яны заключылі. Аднак актывістам адмовілі ў правядзенні мерапрыемства — у адказе Баранавіцкага райвыканкама было ўказана, што ў той жа дзень і ў той жа час аддзел культуры запланаваў там сваё мерапрыемства, таму правядзенне другога будзе немэтазгодным.
Тады актывісты зноў адправілі заяўку ў райвыканкам з просьбай правесці "Мілавідскі фэст" на тыдзень пазней — 9 чэрвеня. Аднак райвыканкам зноў адмовіў актывістам. На гэты раз улады раёна спасылаюцца на парушэнне пункта № 5 закона «Аб масавых мерапрыемствах у Рэспубліцы Беларусь».Праўда, якія менавіта палажэнні закона парушаныя, у адказе не паказваецца.
У тым самым пункце № 5 закона, на які спасылаецца выканкам, распісана ўся інфармацыя, якая павінна ўтрымлівацца ў заяўцы арганізатараў мерапрыемства. На думку актывістаў, яны выканалі ўсе патрабаванні гэтага пункта.
«Мы як ніколі сур'ёзна падышлі да напісання заяўкі: паказалі мэты мерапрыемствы і час правядзення, колькасць удзельнікаў, крыніцы фінансавання, лозунгі, напісалі падрабязную праграму фэсту, назвалі адказных людзей, прыклалі дамовы па абслугоўванню мерапрыемства.Мы не давалі, як гэтага патрабуе закон, ніякай папярэдняй інфармацыі ў СМІ аб тым, што накіравалі заяўку ў райвыканкам. Я лічу, што гэта не мы парушылі закон, а Баранавіцкі райвыканкам не выконвае і парушае артыкул 51 Канстытуцыі Беларусі і не дае нам права на ўдзел у культурным жыцці», — пракаментаваў адмову райвыканкама Віктар Сырыца.
У аддзеле культуры «IP» растлумачылі: праграма мерапрыемства 2 чэрвеня да дня 150-годдзя з дня Мілавідскай бітвы ўжо гатовая і ўключае ў сябе ўдзел чытальнікаў, выступ школьнікаў і настаяцеля мясцовага храма, экскурсію па школьным музею, паказ фільма «Чырвонае лісце» у мясцовым доме культуры.Паводле інфармацыі метадычнага кабінета аддзела культуры, «мерапрыемствы гэтыя — мясцовага значэння», таму рэкламаваць свята не мае сэнсу. Праграма будзе надрукавана ў раённай газеце, а таксама вывешаная ў школе, патлумачылі ў метадычным кабінеце.
