Экспарт беларускай тэхнікі скараціўся на сотні мільёнаў долараў 1

Экспарт беларускіх інвестыцыйных тавараў, да ліку якіх адносіцца прадукцыя машынабудавання, з пачатку года скараціўся на сотні мільёнаў долараў у параўнанні з аналагічным леташнім перыядам.

Як сведчаць статыстычныя звесткі, у студзені-красавіку 2013 года экспарт беларускіх інвестыцыйных тавараў склаў 1,28 млрд. долараў і скараціўся ў параўнанні з аналагічным перыядам 2012 года на 22,8%.

Найбольшае зніжэнне адбылося па грузавых аўтамабілях.

У студзені-красавіку на знешнія рынкі Беларусь паставіла 2.230 грузавых аўтамабіляў (на 49,1% менш, чым за аналагічны леташні перыяд) на 295,3 млн. долараў (зніжэнне ў грашовым выражэнні на 44,6%).

Сур’ёзна знізіліся пастаўкі на знешнія рынкі і іншых інвестыцыйных тавараў.

Так, у студзені-красавіку Беларусь паставіла на экспарт 23,9 тыс. трактароў і седлавых цягачоў (на 21,5% менш у параўнанні з аналагічным леташнім перыядам), у грашовым выражэнні экспарт скараціўся на 22,4%.

Адбылося таксама зніжэнне экспарту іншай сельгастэхнікі (машын і механізмаў для ўборкі і абмалоту сельгаскультур). Пастаўкі гэтай тэхнікі ў фізічным выражэнні скараціліся на 12,4%, у грашовым — на 16,2% да 133,2 млн. долараў.

Беларускія эканамісты тлумачаць зніжэнне экспарту інвестыцыйных тавараў падзеннем попыту на расійскім рынку збыту.

«Сітуацыя на расійскім рынку неспрыяльная: назіраецца стагнацыя ўнутранага попыту, знізіліся аб’ёмы прамвытворчасці, росту інвестыцый у асноўны капітал не назіраецца. Вядома, усё гэта прывяло да таго, што попыт на беларускія інвестыцыйныя тавары знізіўся», — зазначыла дырэктар даследчага цэнтра ІПМ Ірына Тачыцкая.

Намеснік старшыні Беларускай навукова-прамысловай асацыяцыі Георгій Грыц бачыць прычыны зніжэння экспарту беларускай сельгастэхнікі ў тым, што ў сённяшніх няпростых эканамічных умовах Расія стала падтрымліваць мясцовых вытворцаў.

Што да грузавых аўтамабіляў, зазначае эксперт, то праблемы са збытам беларускай прадукцыі звязаны з увядзеннем у Расіі новага экалагічнага стандарту Еўра-4.

«Яшчэ адна прычына зніжэння беларускага экспарту, больш агульная, — уступленне Расіі ў СГА, што прывяло да больш жорсткай канкурэнцыі на расійскім рынку», — канстатуе Грыц.

Нягледзячы на зніжэнне экспарту ў першыя месяцы гэтага года, урад плануе выправіць сітуацыю паводле вынікаў студзеня-верасня. Віцэ-прэм’ер Пётр Пракаповіч у красавіку заявіў, што ўжо паводле вынікаў дзевяці месяцаў урад мае намер «выйсці на рэальнае выкананне ўсіх паказчыкаў для прамысловасці, галоўны сярод якіх — нарошчванне экспарту не менш як на 15% за гэты год».

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ