Тозік абмеркаваў ход будаўніцтва гатэля «Пекін» і жылога квартала «Лябяжы»

Сустрэча намесніка прэм’ер-міністра Беларусі Анатоля Тозіка з кіраўніцтвам кампаніі BUCC (КНР) адбылася 4 верасня ў Мінску.

Кампанія BUCC рэалізуе ў Мінску два буйныя праекты — будаўніцтва жылога квартала ў сталічным мікрараёне «Лябяжы» і будаўніцтва гатэльнага комплексу «Пекін».

Як паведамляе прэс-служба ўрада, на сустрэчы бакі з задавальненнем адзначылі высокія тэмпы будаўніцтва гатэльнага комплексу «Пекін», які, як плануецца, адкрыецца ўжо ў сакавіку наступнага года. Гасцям комплексу
будуць прапанаваныя не толькі камфортныя нумары для пражывання і высокі ўзровень сэрвісу ў гатэлі, але і паслугі некалькіх рэстаранаў, у тым ліку рэстарана кітайскай кухні, казіно і SPA-цэнтра.

Удзельнікі сустрэчы таксама абмеркавалі комплекс мер, якія неабходна прыняць для найхутчэйшага завяршэння будаўніцтва жылога квартала ў мікрараёне «Лябяжы», у тым ліку аб’ектаў сацыяльнай інфраструктуры. У хуткім часе адбудзецца афіцыйная прэзентацыя кватэр у гэтым мікрараёне.

«Старшыня праўлення кампаніі BUCC Чжан Гуйлін падкрэсліў, што кампанія зацікаўлена ў працягу супрацоўніцтва з беларускім бокам па рэалізацыі іншых будаўнічых праектаў, некаторыя з якіх ужо знаходзяцца ў стадыі прапрацоўкі», — паведамляе прэс-служба ўрада.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ