Пра гэта паведаміла Радыё Свабода юрыст Святлана Панамарэнка. Яна ўдакладніла, што сёньня днём Алесь Язьвінскі быў затрыманы ў Баранавічах. Міліцыянты канфіскавалі ўвесь наклад сьвежага нумару недзяржаўнага тыднёвіка “Брама” і правялі допыт рэдактара.
“Па вяртаньні Алеся дамоў яго наведаў сьледчы Нясьвіскага РУУС, а пасьля зь групай міліцыянтаў заявіўся, як ён сябе назваў, начальнік сьледчага аддзелу”, – гаворыць спадарыня Панамарэнка.
У тэлефоннай размове зь міліцыянтамі юрыст высьветліла, што яны ня маюць ордэру на вобшук.
“Старшы афіцэр імкнецца канфіскаваць мікрапрацэсар з кампутару Алеся Язьвінскага, – паведамляе Сьвятлана Панамарэнка, – а свае дзеяньні тлумачыць нібыта намерам рэдактара Язьвінскага зьнішчыць у кампутары каштоўную інфармацыю”.
