Урад Беларусі ў сувязі з гарачым надвор'ем распарадзіўся перанесці тэрмін адкрыцця сезона палявання на дзічыну.
Як адзначае прэс-служба ўрада, з-за гарачага і сухога надвор'я ў шэрагу рэгіёнаў Беларусі абвешчаны чацвёрты ці пяты клас пажарнай небяспекі.
«З мэтай прадухілення выпадкаў узнікнення лясных пажараў распараджэннем прэм'ер-міністра Рэспублікі Беларусь № 214 ад 5 жніўня 2014 года даручана Міністэрству лясной гаспадаркі сумесна з аблвыканкамамі забяспечыць перанос карыстальнікамі паляўнічых угоддзяў тэрміну адкрыцця сезона палявання на дзічыну вадаплаўную і балотную, слонку, вехіра, голуба шызага, перапёлку, фазана на 23 жніўня 2014 года», — гаворыцца ў паведамленні прэс-службы ўрада.
Паводле правілаў вядзення паляўнічай гаспадаркі і палявання, вядзення рыбалоўнай гаспадаркі і рыбалоўства, пачаткам сезона палявання на вадаплаўную дзічыну (акрамя гусей) і балотную, а таксама слонку, вехіра, голуба шызага, перапёлку і фазана была вызначаная другая субота жніўня.
