Месца здарэння. Фота Следчага камітэта.
Месца здарэння. Фота Следчага камітэта.
Самаробная біта. Фота Следчага камітэта.
Як паведаміла прадстаўнік УСК па Віцебскай вобласці Іна Гарбачова,
22 ліпеня ў дом у вёсцы Берастні Бешанковіцкага раёна ўварваліся двое мужчын у масках і з драўлянымі бітамі. Гаспадароў звязалі і збілі. З іх дома скралі 1 мільён рублёў і ювелірныя ўпрыгожанні. Муж і жонка былі шпіталізаваныя. Гаспадар у выніку ў бальніцы і памёр ад атрыманых траўм.
30 ліпеня разбой паўтарыўся ў вёсцы Падлазнікі Віцебскага раёна. Двое мужчын у масках з драўлянымі палкамі ўлезлі ў дом да сямейнай пары. Нападнікі скралі 300 тысяч рублёў, залатыя ўпрыгожанні і мабільнік. Гаспадара налётчыкі збілі, і мужчына ў выніку памёр.
Нападнікаў затрымалі. Гэта жыхары Шумілінскага раёна, 1973 і 1976 гадоў нараджэння. Раней судзімыя. Разам сядзелі ў турме. У іх знайшлі скрадзеныя рэчы.
«Ужо на першапачатковым этапе расследавання ўстаноўлена, што абвінавачаныя перад здзяйсненнем злачынства выконвалі цэлы комплекс падрыхтоўчых мерапрыемстваў: майстравалі з дрэва прылады злачынства, прадметы маскіроўкі, шукалі дамы, у якіх, на іх думку, маглі быць значныя грашовыя ашчаджэнні. Трэба адзначыць, што ў абодвух выпадках абвінавачаныя памыліліся ў сваіх здагадках і здзейснілі напады на сямейныя пары сярэдняга дастатку»,
— адзначыла Іна Гарбачова.
Мужчыны знаходзяцца пад вартай.
